Ex Prome Minister mr. Mike Eman den un declaracion duna a bisa cu e ta spera cu Gobierno mira di berdad e balor di e edificionan MFA y sigui cu e proyectonan.
No solamente sigui cu maneho di esnan existente pero tambe sigui cu construccion di e ultimo dosnan cu falta, cu ta San Nicolas y Dakota.
Esun di Dakota ta uno cu a bini aserca pa motibo di e demanda, y entre otro door di e cantidad creciente di pensionadonan cu ta desea pa cumpli cu nan pagonan pero na un necesidad cortico, y den un ambiente agradabel pa nan. E cambio cu a wordo haci den e brindamento di servicio na principalmente e grandinan tabata un adelanto y di un forma hopi mas agradabel cu antes. E tabata importante pasobra ta un cantidad hopi grandi di ciudadanonan ta haci uzo di nan pagonan via oficinanan auxiliar di Gobierno.
Creando un luga unda por brinda un miho servicio a logra revivia tambe e convivencia comunitario y hunto cu un compania Hulandes, a midi e necesidad den barionan pa un edificio MFA. Despues di a señala e areanan di un miho ubicacion, a aserca SOGA cu ta haci e construccion, percurando tambe pa e financiamento. Na final Gobierno ta “lease” e edificionan aki for di SOGA. E cinco edificionan lo a sali en total 25 miyon florin pa cual a aserca Parlamento pa duna aprobacion pa cera un acuerdo di huur di largo duracion cu AIB.
E ex mandatario a splica cu a cuminsa cu construccion di Noord pa yega na final San Nicolas. E motibo cu a scoge San Nicolas como ultimo tabata pasobra ta e unico cu su edificio tabata mas o menos adecuado, cu por a wordo reconstrui den un MFA, y no mester a busca un tereno nobo y solamente amplia esaki. E tereno na banda cu tabatin mester di dje, ta loke a complica e procedura un poco. Na final mester a a rediseñe pa e cay den e parti di tereno cu ta propiedad di Gobierno y cu finalmente a wordo pasa pa SOGA pa nan haci e construccionnan necesario.
Despues cu diferente di nan tabata cla caba, a haci un re-evaluacion ta cuanto placa mester pa construi esun di San Nicolas y esun di Dakota cu a bini aserca. Esaki ta exigi un ley di adicional cu mester bay Parlamento y pidi aprobacion pa drenta den e contracto nobo cu SOGA y AIB. “Esaki tabata na final di nos Gobernacion. No ta cuestion cu placa a caba, pero mester bay Parlamento pa busca aprobacion pa lease e edificio na San Nicolas. Y esun di Dakota, si Gobierno sigui cun’e, cual ta un combinacion di un Warda di Polis nobo y un MFA den un solo edificio na unda antes tabata Huis van Bewaring di Dakota.”
E discusionnan politico, Eman a bisa, ta trece un ambiente cu no ta esun cu mester enfoca riba dje. E enfoke mester ta si Gobierno kier of no sigui cu e MFA-nan y si kier sigui cu e operacionnan di MFA. E ta bisa esaki pasobra Gobierno a retira e Managernan di Noord, Savaneta y esun di Santa Cruz. Tur e decisionnan aki di Gobierno ta perhudica e continuidad di MFA-nan, y henter e operacionnan cual ta wordo aprecia door di e ciudadanonan den e barionan. Aparentemente e Gobierno no ta mira e balor di un mehoracion di calidad di bida cu e institucionnan aki ta trece cune
