‘BEAM’, e obra artistico y prominente di Michael Lampe diasabra anochi tabata yen di hende entusiasma pa yama bon bini na e candidato nobo di AVP, e conocido musico y unico den su genero Michael Lampe. Su maestra di ceremonia Alice van Romondt a conta di e tantisimo calidadnan di Michael pa despues pasa palabra pa lider di partido, kende a yama e candidato nobo Michael Lampe un bon bini den e partido berde.
Eman a conta atraves di un anecdota di e pakico di su escogencia pa Michael riba lista. “Mi tabatin 16 aña ora mi ruman Henny a bin Aruba y a wordo elegi pa rescata un partido cu un tempo tabata glorioso, victorioso, pero na e momento ey no tabatin ningun asiento den Parlamento di Aruba. Un partido di 1200 voto. Henny tabatin 29 aña, caba di bin di Hulanda, e tabata hopi inovativo, yen di ideanan nobo pa lanta e partido bek. Un di e prome cosnan cu e kier a haci tabata ‘cambia’ e logo rondo di partido. Un logo cu semper a keda yamativo y gusta specialmente pa hobennan. Ora Henny a cuminsa haci cambio den e logo, ami a cuminsa sapatia. Mi a protesta cu tur loke mi tabatin den mi y te unda mi bos por a yega. Naturalmente bo no ta gana e bataya den un caso asina. Mi a logra si cu e logo rondo a keda, Henny a pone algun strepi riba y bou dje.”
Lider di AVP Mike Eman a conta cu segun añanan tabata bay, e mes a cuminsa cambia e logo. Tur eleccion cu e tabata haya e encarga pa yuda pensa riba creatividad di partido, e tabata bin cu logonan nobo cu letranan futuristico di e momento. “Loke mi kier bisa ta cu ora mi a bira 20, 22 aña, mi a realisa loke Michael Lampe a realisa. “Si bo kier rescata algo grandi, bieu den historia y parti di herencia di nos pais, bo tin cu conect’e cu e futuro pa e por sigui wordo carga pa mucho mas aña. Esey ta locual Michael Lampe ta haci pa arte y cultura di Aruba.” Eman a splica cu e echo cu e ta para eynan cu e logo supermoderno di e partido di 13 asiento, ta pasobra cu partido a acepta e reto di inova, di cambia, di renoba y na mes momento di wanta na visionnan, na pensamentonan profundo di e Arubiano cu ta orguyoso di su herencia, di su folklore y di tur loke ta haci e Arubiano ken e ta.
” Michael a haci hopi mes riba tereno di arte y cultura di Aruba durante e ultimo añanan aki. Pesey cu nos ta sinti nos mes honra awenochi di por yam’e bon bini den nos famia grandi. Den combersacionnan cu mi tabatin cu Michael mi a confes’e cu mi sa masha poco di musica y tur esnan cu a yega di mira mi purba baila por confirma esaki. Esnan cu sa tende mi purba canta sa sigur cu mi sa poco di musica.”
Eman a bisa cu e sa di historia y loke ta haci nos un pueblo digno. “Ora mi tende con Michael ta conecta e pasado di Aruba, di loke ta haci nos orguyoso di nos balornan, di e sentimentonan profundo manera sr. Ras cu pasion a papia di dje, ta pasobra el a sinti cu e hoben aki a rescata algo grandi di e pasado di Aruba. El a carg’e y hib’e den futuro y a pone den brasa di e siguiente generacion.”
Dirigiendo su mes na Michael Lampe, Eman a bise cu nan tin un tarea grandi pa hunto hiba Aruba den un futuro nobo. “Nos tin cu inova, sigui cambia, sigui kibra bareranan pa Aruba haya oportunidadnan nobo, pero semper ancra den e balornan di e fundeshi di nos pais y bo a mustra di tin e vision ey.”
