Dos personalidad asina carinjoso y bondadoso cu a capta mi sentimientonan di amistad y carinjo di promer momento cu mi a sinja conoce nan: Jo (Jose Pascual) Fingal y Cheppy Fingal. Morocho cu nan tabata nan tabata trece e caracteristicanan di nan personalidad bunita den harmonia di un duo. Sumamente humilde, amistoso, cu sentimiento pa humor y convivencia, tur locual ta haci nos orguyoso di e Arubiano di nos herencia.
Diabierna nos a dispidi di e ultimo pia di e bunita creacion aki di nos Creador: Jo (Jose Pascual) Fingal. Den e anjanan cu mi a sinja conoce Jo y Cheppy Fingal nan tabata morocho den tur sentido. Den personalidad, pero tambe nan hermandad. Nan tabata biba porta cu porta na Tanki Leendert. Semper hunto. Semper haciendo chiste y refleccionnan cu ta pone Bo pensa. Tur vez cu mi a bishitanan, hopi vez den dianan di Pasco of Anja Nobo, semper e recepcion tabata yena cu cordialidad y amistad. E tabata bin den paar. E recepcion tabata special, pero cada vez e despidida tambe. Ta chistoso ora cu un morocho bisabo “bo no por bai riba un pia” y porcierto hopi convencente. Y nos tabata comparti un mas riba nan bida y salud y riba bienestar di tur cu hunto tabata comparti e momento special aki.
Jo y Cheppy nan cordialidad y historia di trabao duro, di dedicacion y compromiso cu nan famia y nan Pais Aruba ta asina acojedor cu nan ta laga un impresion pa semper riba Bo. Den tur contacto cu nan mi a keda inspira, alegra pa nan humor, chistenan dirigi pa cu nan bishitante, den e caso aki ami, pero tambe entre nan mes. Pero den tur e humor tabata resalta tambe algo mas serio y profundo, e hermandad profundo entre dos ruman gemelo. Ora un a sufri perdida, mas serca e otro a bira di su ruman. Purbando cu su amor y atencion yena un bashi serca su ruman cu e por a sinti manera ta su mesun dolor. Amor prohimo, amor di ruman a haya serca Jo y Cheppy un presencia asina visible, casi tangible, hopi conmovedor. Literalmente e dos personalidadnan aki por a trece alegria caminda tin tristesa, claridad caminda tin scuridad y certitud di e valor di biba cu amor.
Lo mi haya falta di e bishitanan aki, di e momentonan aki, pasobra nan tabata mas cu un bishita, nan tabata un experiencia. Na final tabata serca Jo so, despues cu Cheppy a fayece. Pero Jo a keda cu e mision di ta un luz y un inspiracion pa e bida di amistad y cordialidad cu hunto nan a sembra pa tur nan famia y amistadnan. E ultimo pia di e creacion di bondad cu nos Creador a manda pa nos den un bunita duo a bai laga nos.
Laga nos cordanan cu hopi aprecio, pero tambe cu recuerdo di locual nan kier a transmiti na nos cu nan forma di biba, cu amor y carinjo pa tur. Un inspiracion cu a bin den e mundo aki den paar. Jo y Cheppy Fingal lo keda den mi curason y recuerdo pa semper. Cu nan sosega na Paz den braza di Senjor, manera nan merece. M.G. (Mike) Eman
