Diahuebs den oranan di atardi lider di AVP Mike Eman, den presencia di Parlamentarionan di fraccion berde, a mustra un cantidad di medidanan cu Gobierno ta bay introduci entre e aña’ki y prome di januari, 2020. Ta papia aki di un serie di medida. Gobierno a bin ta dunando un presentacion na gremio den e siman aki.
AVP a haya copia di un ley cu Minister di Finanza Xiomara Ruiz Maduro a presenta y cu ta menciona tur e medidanan cu ta bay cun’e pa aumenta entradanan di Gobierno. “Despues di lesa e ley aki, nos a keda sumamente preocupa y spanta. Nos no sa mas con e pueblo Arubiano por bay sobrevivi na man di e Gobierno aki.”
Ta cuminsa cu e 25 florin cu ta cobra pa recogemento di sushi. Di e suma aki, Afl. 17,50 ta bay pa procesamento di e sushi mientras cu Afl. 7,50 ta bay pa e post di gastonan relaciona cu recogemento di e sushi. E ley aki ta hinca di tal forma cu personanan cu ta haci uzo di otro compania, mester bay paga adicionalmente e Afl. 17,50 pa e post di procesamento di sushi. “Esaki lo por tin consecuencia tambe pa e companianan cu ta brinda e servicio aki, pero tambe consecuencia pa e poder di compra di e ciudadanonan di Aruba.” Tambe den e ley, Gobierno ta autorisa e director di SERLIMAR pa hasta haya poder di Deurwaarder, cu por pone beslag riba entrada di un ciudadano.
Pues nan ta bay tin e mesun podernan cu un Deurwaarder. Pa aumenta e entradanan aki, pa cada camber di hotel ta bay cobra 2 dollar adicional. Eman ta puntra si Gobierno a haci un evaluacion caba di e peso cu ta pone riba turismo. Ya caba ta scuchando hopi reclamo. Den pasado caba a pidi hotelnan pa contribui cu e desperdicio di sushi, cu e bakinan banda di caminda. Tambe e pregunta ta si Gobierno a studia kico e impacto esaki lo tin pa e posicion di competencia di Aruba ora keda pone mas costo riba e bishitantenan.”
Companianan cu tin un negoshi chikito, manera Eenmanszaak cu tin e adres di cas poni tambe mester bay paga 300 florin extra pa recogemento di sushi. Na KvK ta conoci cu tin mas di 10 mil di eenmanszaak inscribi di cual hopi no ta activo mas. Pero tur ta bay wordo cobra, si nan haci uzo di e servicio of no. Companianan mas grandi ta bay paga 420 florin. Esaki cu e impacto cu BBO tin caba riba caminda, segun Eman, esnan di menos recurso no por sobrevivi den e pais aki mas. Gobierno ta subsidia SERLIMAR cu 12 miyon. Awor cu e ley aki e subsidio ta baha cu 10 miyon pero den 5 aña. AVP ta calcula cu pa medio di e ley aki ta bay ranca 40 pa 50 miyon for di pueblo mientras cu e subsidio na SERLIMAR lo no baha. “Nos no sa unda e fraccionnan cu ta sostene Gobierno ta asumi nan responsabilidad pa tur e pesonan cu ta pone riba e pueblo Arubiano. Spera miembronan di e coalicion aki samina nan consenshi y conclui cu e cos aki a bay demasiado leu y cu pueblo no por carga mas medida. E ta un empobrecimento grave di nos hendenan.”
E Minister a manda pidi Parlamento pa trata e ley aki cu hopi rapidez, locual ta indica cu kier “bulldoze” e ley.
