Mike Eman: Caida di poder di compra y perdida di cupo di trabao preocupante

Den tur skina rond Aruba, por scucha ultimo tempo di  negoshinan cu ta cera of cu ta haci nan operacion mas chikito, considerando e situacion financiero actual of cu nan ta premira pa  e siguiente lunanan.

Esaki tambe ta wordo confirma den e rapport di Banco Central pa e di dos kwartaal di 2018, esta  e “Business Perception Survey, Result for the 2nd quarter 2018” y cual ta motibo di preocupacion grandi di parti di partido AVP y cu lider di partido, Mike Eman a vocifera na prensa.

El a mustra cu e survey di Banco Central di Aruba  a nota un desaroyo hopi preocupante tambe  y a mustra den su rapport cu durante e di dos trimester di 2018, tabatin un caida grandi den negoshinan cu ta concidera nan mes rendabe. Di negoshinan encuesta ta mustra cu tabata tin caida di 21.0 porciento di companianan cu ta concidera nan mes rendabel. Esaki for di 96.0 porciento, den e prome trimester, pa 75.0 porciento den e di dos trimester di 2018.

“Cada bes nos ta tende excusanan politico cu  “nos a hereda un pais den debe, of situacionnan cu ta wordo pinta negativamente”, pero e survey Banco Central di Aruba  ta raporta cu den prome trimester di aña tabatin un pais cu tabata registra su comercio cu 96%, pues casi 100% di e negoshinan di e pais ta bisa di tabata rendabel.

Despues di apenas algun luna di e gobernacion nobo esaki a cay te na 75%, pues un caida di 21% den tres luna di registro di desaroyo na Aruba y esaki no ta algo cu Mike Eman of AVP  ta bisa.

Esaki ta nifica cu negoshinan ta cerando, cu negoshinan ta bay haci nan operacion mas chikito y resultado logico di esaki ta cu  e empleadonan ta bira e victimanan, cu ta haya of lo haya nan retiro. Tur esaki tin di haber cu e falta di confianza den e maneho di e gobierno actual. Mucho negativismo, mucho persecucion politico, mucho previliegio pa amigo y famiarnan mientras pueblo ta worde asota cu medida. E desilucion den incumplimento di promesanan haci, racha di medida y falta di un voluntad positivo y capacidad pa dirigi nos Pais a bira obvio trempan den comunidad y esaki a conduci na e caida grandi di confianza den futuro di Aruba.

Tur rond di Aruba ta tende di peticionnan pa retiro y pa cera negoshi y esaki ta un evidencia cu ningun hende por nenga, di e cambio di direccion di e pais aki cu e gobernacion cu nos tin actualmente. E preocupacion pa nos tur mester ta sumamente grandi pasobra den e cifranan aki no tin e efectonan real di e medidanan cu a drenta na vigor dia prome di juli ainda.

Negoshinan a  anticipa e consecuencianan y a cuminsa baha nan inversion y a sinti cu nan ganashi a cuminsa wordo afecta dor di e hecho cu pueblo a cuminsa gasta menos, promer pa medio di locual ta bin y awor forsosamente dor di e impacto di e medidanan..

Tur esaki a conduci na  cu empresanan ta perde confiansa y na ta stop di inverti pa algo nobo of expancion di nan negoshi y aki tin cu mustra cu BCA ta bisa cu durante e di dos trimester di 2018, e companianan encuesta a indica un caida den e inversionnan, ya cu 9.9 porciento mas di esunnan encuesta, a bisa cu e condicionnan pa haci inversion “a empeora.”

Esaki ta indica cu Aruba lo bay perde loke cu e tin pero tambe ta perde loke cu mester a haya nobo den inversion, esta empresanan nobo, cu lo a percura pa Aruba a crece.

E efecto di tur locual gobierno actual ta haciendo, no solamente ta afecta e realidad di awe  pero den e estudio di BCA ta mustra cu el a afecta tur plan cu empresanan tabatin pa futuro y poco-poco sea no ta amplia of esunnan nobo, no ta bay bin mas y ora cu no tin empleo cu ta wordo crea,  desempleo ta bay crece.

 

Lider di AVP a sigui mustra cu  cu den tres luna di maneho di introduccion di medida, mientras cu ta scucha di tur e nombramento di amigo y famianan den gobierno, ta trece un desconfiansa sumamente grandi den futuro di e pais aki y por mira esaki den  cifranan.

“Un pais cu tabatin 95% di negoshinan rendabel cu a baha cu 21%; a haya un pais cu 84% na inicio di 2018 ta bisa di lo bay inverti den e pais y esaki a cay cu 10%. Mas preocupante di tur esaki ta cu BCA den su analisis no ta mira cambio positivo pa futuro y ta mustra  cu e “Business Perception Survey” ta indica cu e caida di confiansa cerca e encuestadonan a cay den e di dos trimester di 2018 y cu e sentimento aki lo sigui  asina den futuro cercano. Esta caida di inversion, caida di perdida di compra, caida di un pais cu tabata tin y economia stabiel,” Mike Eman lider di AVP a declara. Pesey e ta haci un yamada pa un union nacional pa rescata Aruba for di e direccion robez aki