“Un di e metanan principal cu mundo a pone su dilanti pa e siguiente añanan ta pa combati pobresa. E ta SDG # 1: No poverty” y na Aruba lamentablemente nos lo no por raporta positivamente riba e avance di e meta aki e ultimo dos añanan”, e lider di AVP, mr. Mike Eman a expresa awe.
Mr. Mike Eman a haci esaki durante un Conferencia di Prensa hunto cu dr. mr. Rycond Santos do Nascimento, Presidente di Fundacion Digna Lacle Herrera caminda nan a anuncia e desaroyo di un Plan Aruba nobo di AVP. E marco di guia y referencia di plan nobo aki lo ta e 17 Sustainable Development Goals (SDGs) adopta na United Nations. Dia 22 y 23 di juni Partido AVP hunto cu su fundacion y expertonan local y internacional den un “retreat” special a inicia e dialogo y refleccion riba Plan Aruba nobo y e asercamento holistico aki mr. Eman a splica.
Ex Prome Minister Mike Eman mes a hiba palabra na United Nations den nomber di Reino na momento cu a planta e compromiso di e 17 metanan importante pa alcansa un miho realidad di bida pa humanidad y durabilidad sano di nos planeta y su naturalesa. Eman a splica cu den pasado su gobierno a enfoca hopi riba sera e diferencia cu tabata tin entre desaroyonan na Aruba pa asina por yega na un prosperidad mas duradero y hustamente comparti entre tur ciudadanonan y den cada region di nos Pais. Pesey a traha riba renobacion di barionan, centronan di ciudad, schoolnan y mehoracion di poder di compra. Y tur esaki den Dialogo cu comunidad.
Awor Eman ta splica e vision lo ta basa riba un asercamento holistico di tur e 17 metanan universal (SDGs). Esaki ta rekeri un dialogo intensivo y habri den comunidad, pasobra cu esfuerzo y un bon vision hopi lo por worde alcansa, pero ta bay tin tambe cosnan cu lo mester bay den otro forma. E ehecusion di un meta, por ehempel esun economico no lo por bai a costo di esun di medio ambiente of salud di nos hendenan.
Lo mester traha cu creatividad caminda un meta ta fortifica e otro. Un economia y desaroyo basa riba e principionan circular, caminda un desaroyo ta sirbi e otro desaroyo y den e balansa aki ta logra e prosperidad social y durabilidad di nos naturalesa y planeta. Pa esey e compromiso lo mester ta uno hopi cla y cu apoyo di gran parti di comunidad pa por realisa e prosperidad comparti dentro di margen di un desaroyo ecologico sano, positivo y sostenibel.
Pa logra esaki mr. Mike Eman y dr Rycond Santo do Nascimento a splica cu Partido AVP hunto cu Fundacion Digna Lacle Herrera y Fundacion Mito Croes lo desaroya e vision aki di un forma democratico y participativo, usando metodonan cualitativo y cuantitativo pa compila e datonan necesario. Cu e meta aki AVP lo combina reunionnan den formato di Dialogo Social, Town Hall Meeting y Mil Voz cu ta incorpora tambe formatonan moderno digital cu diferente encuesta pa reuni datonan (metodo cuantitativo).
E Lider di AVP, mr. Mike Eman a enfatisa cu e marco di referencia y obhetivonan universal di SDGs ta duna un bon cuadra pa bai traha e vision y Plan Aruba holistico aki. Si mira con SDGsnan, cu tabata desaroyando den un bon direccion y awor ta bayendo den un rumbo negativo cu Gabinete Wever Croes e ta haci e asercamento y e Plan Aruba holistico di AVP mas urgente ainda.
Mr. Eman ta duna como ehempel: SDG 1; No poverty; SDG 2: No hunger; SDG 3: Good Health and Well-Being; SDG 4: Quality Education; SDG 7: Afordable and Clean Energy; SDG 11: Sustainable Cities and Communities. Si mira cuanto nos tabata haci pa avansa e metanan aki y con awor nan ta bayendo atras anto e urgencia pa e Plan Aruba di AVP ta hopi grandi, mr. Mike Eman a finalisa bisando.
