Ex Prome Minister di Aruba y lider di AVP mr. Mike Eman, hunto cu su esposa Doina, a compaña e comunidad Colombiano durante un servicio religioso na Misa Birgen di Fatima na Dakota, diasabra mainta.
E sirbishi di misa aki, organisa door di Consulado Colombiano na Aruba, tabata den cuadro di celebracion di 209 aña di independencia di Colombia, conoci como “El 20 de Julio”.
E ex mandatario den un declaracion duna a recorda con e independencia aki a keda realisa por medio di Simon Bolivar, kende su documentario ta pasando e dianan aki na television. “E logro aki a bay compaña pa hopi lucha y sacrificio.
Un tempo unda cu e tabata idealnan grandi pa construi paisnan autonomo na mundo. Sigur Aruba por identifica su mes cu e proceso aki pasobra e ta algo cu nos antepasadonan a sinti e mesun pasion aki y a lanta para pa Aruba un dia ta Baas den su mesun cas.
Awe nos ta celebra esaki cu un pais bisiña, kende tin e comunidad inmigrante di mas grandi na Aruba. Rumannan di Aruba cu a yuda nos construi e siguiente etapa di progreso di Aruba. Nos ta hopi orguyoso y kier bisa nos rumannan di Colombia pabien. Aruba semper ta comparti e isla cu tur comunidadnan bibando aki.”
E ex mandatario a gradici Consulado Colombiano masha hopi pa por a celebra hunto cu nan un fecha asina special pa e pais.
