Mike Eman: 12.000 pensionado ta perde “Reparatietoeslag”

“Corto despues cu nos a asumi responsabilidad di gobierno na 2009 nos a baha BBO di 3% pa 1.5% y nos a introduci reparatietoeslag pa esnan riba un salario minimo te cu Afl. 2500,= pa luna y nos a aumenta bijstand cu 25%. Tambe nos a duna famianan riba bijstand cu yiu cu ta bai scol un schoolkinderentoeslag adicional di Afl. 200,== pa cada mucha. Pa nos pensionadonan nos a crea un repartietoeslag riba nan Pensioen. Nos a haci esaki hustamente pa manera e palabra ta bisa “repareer” e perdida di poder di compra cu especialmente e ciudanonan aki, esnan riba salario minimo, bijstand of pensionado, a pasa aden cu introduccion di BBO y su inflacion. Awe gobierno ta bai kita e reparatietoeslag di pensionadonan y si nos no cuida nan lo kita reparatietoeslag di tur hende” asina ex Prome Minister Mike Eman a expresa despues di a gana e caso pa tene un reunion di informacion Diamars 26 di juni na MFA Noord.

Ex Prome Minister Mike Eman ta cita e texto di e ley caminda gobierno ta bai kita reparatietoeslag di esnan cu tin AOV y un entrada adicional:

Ex Prome Minister Mike Eman ta bisa cu ta trata di alrededor di 12.000 pensionado cu lo perde nan reparatietoeslag desde 1 di januari 2019. Esaki sigur lo conduci na situacion dificil pa nos grandinan. Pa esnan cu tin AOV so ta subi reparatietoeslag cu Afl. 25.== mientras cu gastonan lo subi cu Afl. 100,== riba cada Afl. 1.000,==. Esey kiermen cu defacto e pensionado cu AOV so ta bay perde hopi poder di compra. Esnan cu AOV y entrada adicional ta perde nan reparatietoeslag por completo y mester carga cu e peso completo di aumento di BBO. Un bes mas Aruba ta bay drenta e fase di “sociale verpaupering” manera cu Presidente di Banco Central a bisa tempo cu BBO a bin na vigor. Eman ta hopi preocupa pa pueblo en general y specialmente nos pensionadonan.

Comments

comments