Durante conferencia di prensa di fraccion di AVP, parlamentario Mike de Meza a expresa cu e hydrocable ta parti di e stembedrog cu nan ta conoci pe. Campaña ta uno, goberna ta otro cos, wak si nan ta bin cu e hydrocable for di Colombia cu nan a priminti, cu ta tecnologia nobo cu no tabata sa kico e gobierno anterior no tabata sa kico nan tabata haci. Awe exactamente ta cosnan cu gobierno anterior tabata haci, MEP ta sigui haci, pasobra MEP nunca a sa di goberna. MEP nunca tabata tin ni vision ni idea, kico ta encera goberna e pais aki.
Por hedge den diferente forma. Ta cuanto bo ta paga p’e. Pasobra bo por hedge na 56 dollar, pero esey ta nifica cu ta 56 dollar so bo ta paga. Si bo hedge na 56 dollar, pero si e parti abao cay liber, cu na e momento e prijs bay abao, bo probecha di e prijs pe, pero tin un gasto pe. Na momento cu bay riba dje, e ora e seguro ta cover e gastonan adicional. Tambe tin un gasto p’esey. Tin otro gastonan cu bo tin cu paga p’e tambe. Si bo kier pone un dak ariba, un dak abao of un vloer abao, ta hedge na 56 te cu 30 dollar. Eyden ta paga locual e ta bao di 30 dollar, ta keda paga 30 dollar. Riba di 56, ta keda paga 56. Tambe tin diferente prijs p’e.
Cuanto bo ta bay hedge, a con largo bo ta hay hedge, kico ta e premiesnan cu bo ta bay paga. Ora bo bay un seguro y bo kier sigura bo cas, tambe bo por haci hopi cos. Pero mas bo sigura bo cas, mas bo kita tur e riesgonan bo tin, ta mas caro bo ta paga pe y ta yega un momento cu bo ta mira cu e risiconan ey cu ta paga p’e, ta mucho caro y e ora bo ta limita e coverage di cierto risiconan cu bo tin pa bo por paga esaki. Tur esaki tin un discusion. No mester lubida cu ora cu ta hedge den termino cortico, bo tin un risico tambe. Pasobra bo ta hedge pa tres luna, pero despues di tres luna bo no ta haya e mesun prijs, depende kico pasa riba mercado.
Ora bo hedge pa un termino mas largo bo por lock’e down. Pero e risico ta, si e prijs cay of bay ariba, kico ta haci den dje, enfin. Asina bo tin tur e diferente variabelnan cu bo tin cu tuma na consideracion y tin cu discuti esakinan.
Hedging a wordo introduci na Aruba bao di gobierno di sr. Nelson Orlando Oduber. Por corda den cuminsamento di añanan 2000, nan a hedge te cu 2008 mas of menos y nan a perde sigur mas cu 30 pa 40 miyon durante e añanan ey.
Hedging no ta nada nobo. Tur caminda na mundo ta hedge. Nos mes ta hedge pa un seguro di bida, of auto, pa seguro di accidente. Mester sa kico ta haci y tin cu discuti’e. Den e caso aki no ta simplemente e director di WEB ta tuma e decision of e minister ta tuma e decision. E mester ta algo cu bo ta discuti riba plataforma nacional cu bo comercio, cu bo partnernan sindical den un dialogo social. Tin cu bay parlamento cune y discuti esaki.
Cu esaki, a tuma e decision pa haci e pasonan aki necesario, awe e mesun personanan cu a papia malo di e hedging, demonise, rechas’e, a bisa cu hende tin cu bay cera, cu tabata tin hortamento. Awo ni dos luna den gobierno, nan ta e prome cu ta duna e instruccion sin sa kico nan ta haci. Duna instruccion pa bay hedge. Ta mustra cu e hendenan aki ta bisa un cos, haci un otro cos.
Manera ta conoci den Hulandes, stembedrog, lagabo keda un cos, mañan ora nan sinta, otro cos ta tuma luga. Bao di gobierno di AVP tabata tin full un programa di energia alternativo, concienta e pueblo di Aruba. E direccion cu ta bay mester a haci uzo di supply site management, cambia for di sistemanan convencional, bay na sistemanan mucho mas eficiente. Prome cu bay na gas natural, cu ta un otro cos cu ta sumamente importante pa bay den e direccion ey. Tabata tin un programa total cu a traha riba dje. Awe bo ta mira un gobierno ta sinta cu no sa kico pa haci riba tereno di energia. E unico cos cu nan a bisa den pasado cu ta e locura mas grandi tambe, ta pa bin cu hydrocable for di Colombia. Ta sinta warda riba esaki cu ta pretende di rescata Aruba su economia y e prijs di awa y coriente. Prome cu e gobierno aki bay cas, pueblo di Aruba, prepara bo mes, pasobra brandclausule lo bin bek. Lo tin tur sorto dividendo cu lo bay saca di e companianan. Tempo cu MEP tabata den gobierno, nan a saca 70 miyon den dos aña como dividendo. AVP a sinta e prome cuater añanan y ni un florin nan a saca na dividendo. Ta e operacion cu ta bay mira awor aki y lo mira e fluctuacion di prijs y lo mira e gastonan.
