Ta tristo, pero Gobierno no ta haciendo ningun intento pa mira si e refineria por habri su portanan. “E ta un situacion lamentabel y hopi tristo pa mira un refineria para y no tin ningun actividad mas tumando luga eyden,” Parlamentario Mike de Meza a bisa den un declaracion para dilanti e instalacionnan di e refineria.
El a repasa henter e proceso cu nan a cana ora cu a drenta Gobierno y a haya e refineria cera. A hiba negociacionnan intenso cu Valero, a biaha cu companianan estatal rond mundo te cu finalmente a yega un operador interesa cu ta Citgo. El a recorda cu na momento cu Gobierno a cambia tabatin mas cu 600 mama y tata di famia trahando eyden.
Loke e no ta compronde cu na momento cu esnan di Gobierno actual tabata den oposicion tabata para pa e refineria keda habri, haci tur lo posibel pa mantene habri. Pero awe cu nan ta den Gobierno no tin nada tumando luga. Hasta Prome Minister a negocia un MOU pa cera e refineria definitivamente. “E ta bisa cu esaki ta temporalmente, pero bo por scucha di su palabranan cu e temporal mester bira definitivo.”
E intencion di e mandatario ey tabata pa haci e area di e refineria un luga pa planta marihuana y haci e sector aki e di dos pilar economico di Aruba. “Bo ta mira cu ta un Gobierno cu no tin intencion pa e refineria habri su portanan. A sinta cu dos partner den coalicion cu publicamente a bisa cu nan ta contra apertura di e refineria, y a yega na acuerdo cu lo no haci nada pa e reapertura. Y awe ta demostra cu no ta haci nada pa habri e refineria.” El a sigui bisa cu e Minister no ta sinta ni biaha pa busca e chens pa habri su portanan bek. El a anuncia masha contento e MOU, pero cu no ta mara huridicamente. Desde e acuerdo cu CITGO, e refineria ta di Aruba. E ta papia di 25 grupo interesa, pero no ta tende nada. Y pa colmo asunto di energia ta cay bou di Prome Minister, kende ta trahando pa cera e refineria en bes di habrie. Unico plan cu tin ta pa saca e terminal di e refineria y hink’e dn man di Friends & Familiy, y interes general no ta wordo sirbi.
E Parlamentario ta sinti cu a gaña hopi cu ta bay habri e refineria pero ta cerando esaki. Y pa e motibo aki ta cu hopi mamay famia ta sufriendo. Loke cu nan ta bon den dje ta persigui hendenan politicamente. Den tur tempo a sinta solamente un biaha cu director di e refineria mientras cu partnernan mes ta bisa cu nan ta contra apertura di e refineria.
Esaki ta bira di cinco biaha cu MEP ta den Gobierno cu refineria ta cera of operador ta cambia. E ta un lastima y esey ta un realidad, e cambio cu pueblo a vota p’e, pero bou engaño. Y den tur esaki ta pone medida riba lomba di pueblo, y enrikisiendo famia y amigonan.
