Carubbian Festival a ranca sali diahuebs ultimo den un bachi completamente renoba. Tabatin hopi expectativa den comunidad pa cu e re-lansamento di Carubbian.
Minister di Turismo, ing. Mike de Meza tabata presente na e anochi aki den e prome edicion di Carubbian unda a ilustra e ultimo 150 añanan di e desaroyo di San Nicolas den tur forma.
Na San Nicolas tabatin diferente desaroyo a tuma luga for di tempo di e minanan di fosfaat y for di e momento cu esaki a cera y cu e hendenan mester a bandona Aruba.
Minister de Meza a sigui bisa cu e hendenan aki a regresa ora Lago a habri na Aruba. E generacion di Arubianonan nobo den e añanan 20 bin ariba a trece diferente otro custumbernan, creando un cultura combina cu e aporte di personanan di otro paisnan cu a bin traha y na mesun momento a establece na Aruba.
E mandatario a agrega cu banda di esaki tin e florecemento di nos carnaval y di turismo. Kiermen Carubbian awo ta un show cu un contenido diferente unda ta ofrece e turista, e historia di Aruba como tambe pa nos mesun Arubianonan y e hendenan di otro islanan of di Hulanda cu ta bishita nos isla. Carubbian ta bay ta tur siman. Despues e contenido lo cambia, pero lo keda honra e personanan cu a contribui cu cultura, musica y baile na e cultura di Aruba den su totalidad, asina Minister de Meza a indica.
“Esaki tabata un anochi sumamente bon. Nos tin e food court y hopi hende a purba e diferente tipo di cumindanan cu tin na San Nicolas. Bo por a mira, tabata hopi yen eynan. Bo tabatin tambe productonan cu ta wordo traha na Aruba manera biña, pica di papaya y otro tipo di frutanan, juicenan traha door di nos Arubianonan mes”, asina Minister De Meza a expresa.
Banda di esaki tabatin e jump up di e semi carnaval caminda e turistanan por a join esey tambe. Mester ta orguyoso di nos hendenan y nos mesun talentonan cu por a haci un show asina aki, a bisa.
“Mi ta masha contento cun’e. E producto aki ta bay ta un producto superior pa tur e turistanan cu ta bin Aruba, pero nos ta bay keda optimaliz’e y e ta bay bira algo sumamente grandi”, Minister di Turismo, Ing. Mike de Meza a remarca.
