Mike de Meza: Aruba Tourism Authority ta proyecta crecemento den turismo pa otro aña

“Mi ta contento cu ATA ta entrega nan presupuesto di otro aña caba, cumpliendo cabalmente cu reglanan vigente”, asina Minister di Turismo, Transporte, Energia y Medio Ambiente, Ing. Mike de Meza a duna di conoce despues di a ricibi e presupuesto for di man di director di ATA hunto cu Hunta di Supervision. Ta den e presupuesto aki ta fiha e vision y maneho pa aña 2018, mara na e fondonan aloca.

 

Aruba Tourism Authority (A.T.A.) ta proyecta un crecemento di 3.7% den ‘stay-over arrivals’; crecemento di entre 2% y 3.5% den Tourism Receipts, mientras cu ta estima un resultado di 0.8% di “Revenue per Available Room (RevPar)”. Turismo crucero ta proyecta pa crece minimalmente cu 7% den cantidad di pasahero.

 

Probablemente e aña aki ‘stay-over arrivals’ lo conoce un caida di 6.6% incluyendo Venezuela y cu un aumento di 5.9% si exclui Venezuela. E RevPar te cu juli ta mustra crecemento mas fuerte den Caribe, esta di 12.3%. Tanto den 2017 como tambe den 2018 lo experencia un crecemento fuerte den e temporada abou di turismo crucero, mientras cu temporada halto ta keda stabiel.

 

Di acuerdo cu e presupuesto presenta pa 2018, un total di 71.4% di e entrada operacion di A.T.A. lo ta destina na mercadeo y promocion, 7.2% na desaroyo di nos destinacion, 1.2% na e fondo di Aruba Hospitality and Security Foundation y 16.7% na gastonan operacional.

 

“Cu turismo siendo un pilar importante di nos economia, e rol di Aruba Tourism Authority den promove y percura pa crecemento ta esencial. Ta obvio cu nos a laga e maneho den man di e expertonan eyden, sin metemento directo y a cambio ta nota un bon prestacion”, asina Minister Mike de Meza a finalisa bisando.