Departamento di Asuntonan Social a drenta bario di Dakota pa un charla special riba cuido di nos grandinan. E evento a tuma luga den Centro di Bario Dakota. Noemi Maduro di Departamento di Asuntonan Social a enfatisa cu nan a invita varios otro partner pa comparti informacion cu e publico presente. Specialmente riba cuido di nos grandinan den nan mesun cas, kico pa haci pa percura pa haya cuido na cas mes, a elabora riba demencia y kico ta e retonan cu e enfermedad ey ta trece cune.
Hopi biaha no ta realisa cu ora e grandi haya demencia, ta un switch completo den su bida y bida di e famia rond di nan. “E ta hopi cruel, pasobra nan no ta comprende con pa anda cune, ta bira fastioso. Pues pesey nos di Departamento di Asuntonan Social t’ey pa sostene tipo di famia cu tin preocupacion pa cu demencia”, asina Noemi Maduro a splica despues di e charla cu tabatin como tema “Nos grandi y su cuido”.
E problema di nos grandinan cu mester un centro pa haya atencion ta hopi grandi. Noemi Maduro a enfatisa cu na Departamento di Asuntonan Social nan ta na altura cu tin un lista di espera di no menos di 150 persona. Nan ta wardando luga pa por drenta SABA, cu ta e fundacion cu ta maneha tres di e casnan di nos grandinan. Ta famianan cu ta bisando cu nan no por mas cu e grandi, pa por haya yuda.
Banda di SABA tin e casnan di cuido priva cu Gobierno no tin nada di bisa den con nan ta brinda servicio. Departamento di Asuntonan Social ta cay aden pa intercambia idea cu e doñonan di e casnan aki pa baha e costonan, mientras cu Inspectie Volksgezondheid Aruba (IVA) tin e rol importante pa garantisa calidad di cuido. Nan tin e poder pa drenta e casnan pa investiga con e cuido ta tuma luga den e luganan aki.
Pa loke ta enviehecimento general, e aña aki, esta aña 2018, e cifranan oficial ta bisa cu 25% di nos pais ta den e fase di “vergrijzing”. E cifra ey lo no baha, al contrario, na aña 2030 ta pronostica cu un tercera parti di nos poblacion, pues 33,3% lo ta den e fase di vergrijzing.
Solucion pa e aumento den cantidad di grandinan den comunidad, banda di e realidad di cupo limita den centronan specialisa di cuido, cu famianan mes mester “take care” di nan grandinan. Mescos cu ta bisa “It takes a community to raise a child”, mescos awendia ta bisa cu ta tuma un comunidad completo pa sostene y salvaguardia cuido di nos grandinan.
“E miho cuido cu e grandi por tin, ta keda den su comfortzone, pues den su cas. Anto nos di Departamento di Asuntonan Social t’ey pa percura pa e cuido yega cas den e ambiente familiar. Y hunto cu famia, nos ta cla pa duna guia”, asina Noemi Maduro a sigura.
Ta bon pa enfatisa cu otro partnernan importante den e trabounan aki di brinda cuido na nos grandinan ta entre otro, Wit Gele Kruis, Alpha Hulp, Centro di Memoria, SABA, casnan priva di anciano y sin lubida Departamento di Asuntonan Social.
Na final a enfatisa na tur presente, cu Gobierno ta e ultimo yama pa yuda den e tipo di situacionnan asina. A subraya e hecho cu famia ta e prome yama pa brinda cuido y sosten na nan grandi. No solamente pasobra esey ta un necesidad awor den e scarsedad di cupo den casnan di ancianonan, pero tambe pasobra den seno familiar e grandi ta sinti su mes hopi miho. Ta solamente den casonan unda e grandi no tin famia, e ora Gobierno ta saca un man y yuda den e fasenan necesario.
Pa tur esunnan cu ta interesa pa sa mas di “Nos grandinan y su cuido”, por atende e siguiente charla cu ta tuma luga diahuebs awor dia 13 di december 2018 pa 7:00pm na Centro di Bario Brazil. Entrada ta gratis, pero por registra adelanta dor di yama 5281100.
