Na salida for di e reunion di comision di salubridad caminda a haya un presentacion di e reformanan cu kier haci den AZV, parlamentario Miguel Mansur (Accion 21) a trece un punto padilanti cu e ta considera un masha importante: “Si nos ta bay haci recorte riba pueblo, ta ora pa nos discuti terminacion di e programa AZV Plus”
AZV Plus ta e programa cu ta duna empleadonan publico y nan famia, esta casa y yiunan, beneficionan adicional compara cu e ciudadano comun. E programa aki a costa AZV aña 4.2 miyon florin. Mansur ta kere cu no ta moral pa corta den e cobertura cu pueblo ta haya y pidi nan pa duna un eigenbijdrage, mientras cu tin un grupo ta sigui gosa di privilegio, manera cu ta e trahadonan di gobierno.
En general, e conclusionnan cu Mansur ta saca for di e reunion tanto mainta, como atardi, ta cu recorte ta keda primordial y mester siña traha mas eficiente cu e recursonan cu tin. “Si nos elimina AZV Plus, tur hende na Aruba tin e mesun nivel di seguro. E ta libera fondo cu por implementa pa otro cos of yuda yega na e recortenan pa ta solvente. Mi no ta kere ta husto of moral pa corta den pueblo en general y laga e sector publico cu un beneficio.”
