Den cuadro di e reunion realisa awe pa trata e ley di screening di minister, presidi pa presidente di parlamento mr. Edgard Vrolijk, tabatin dialogo y algun discusion andando for 9:00 am den sala di parlamento. Ta di nota cu esaki ta bira di shete biaha cu ta tratando un ley di screening.
Miguel Mansur, lider di fraccion Accion 21 como parti di oposicion a splica cu e debate andando ta sigur uno interesante. Sinembargo, a bisa tambe cu e ta un desapunto grandi pa honestidad como tambe pa gran parti dje pueblo cu kier wak un cambio real.
Accion 21, sosteni pa fraccion MAS, a bin cu un amienda pa corigi e fayo grandi den e sistema esta pa haci di e formado un persona apolitico, pues cu no tin afiliacion na ningun partido politico. Sinembargo, segun Vrolijk, no a splica bon cla kico ta ‘apolitico’ ta nifica.
Segun Mansur, a splica esaki bon cla den e amienda splicando cu un persona cu ta candidato pa bira minister no por ta formado.
Tambe segun Mansur, Vrolijk lo a bisa cu e amienda pa un persona bira minister solamente si tin un nivel minimo di enseñansa di HBO ta ‘viola’ e staatsregeling y esaki a pone Mansur cuestiona Vrolijk su preparacion huridico ya cu un HBO-opleiding ta realisabel pa tur hende. “E desapunto mas grandi ta cu e no kier a papia riba e contenido di e amienda, e kier a critic’e cu e ta na Papiamento”. Asina Mansur a bin recorda Vrolijk cu na 2003, ta Rudy Croes a haci Papiamento un idioma oficial y griffier a bisa tambe cu por entrega un amienda den Papiamento.
Pa cobertura mas amplio lesa edicion di TREMPAN mañan.
