Dia 2 di november 2021 mi a manda x18 pregunta pa MinTINO, Ursell Arends y MinAIE, Glenbert Croes, tocante e nombracion di e Director nobo di Utilities, N.V. Mi a pidi Minister comparti cu Parlamento evidencia cu e anuncio pa un Director nobo a sali den tres diferente corant na Aruba y e condicionnan mara na e funcion aki. Mi a pidi informacion riba cuanto candidato a solicita, ki tipo di evaluacion nan a pasa etc. Tambe mi a pidi clarificacion riba cierto iregularidadnan cu a sosode den e proceso y te awe mi no a haya NINGUN contesta di nos Minister di Integridad ni tampoco nos Minister di Energia. Awor prome cu Minister Arends bisa cu ta MinAIE mester contesta e preguntanan, ta su persona como Minister di Integridad mester percura cu proceduranan cu a wordo estableci pa preveni “friends & family” y otro bagabunderia no sosode, pa no papia mes di su deber di sigura cu tur Minister incluyendo su persona ta respeta ley y contesta preguntanan di Parlamentarionan.
Dia 5 di november 2021 mi a manda x13 pregunta pa MinTINO tocante nombracion di e directiva nobo di Fundacion Lotto pa Deporte (FLPD). Te awe, mas cu cuatro luna despues ainda mi no a haya contesta. E Presidente nobo di FLPD ta un ex-parlamentario di partido MEP y tambe un ambtenaar activo como hefe di afdeling Toezicht en Handhaving den DIP y tambe voorzitter di Stichting Monumentenfonds. Mi a pidi clarificacion si esaki ta permisibel pa tur ambtenaar activo, ki compensacion y vergoeding e ta haya y si esaki ta ser considera nevenarbeid? Mi a pidi pa Minister splica si e ambtenaar(nan) nombra pa Hunta di Supervision FLPD tin permiso formal (via procedura di DRH) pa haci nevenactiviteiten mientras ta eherce trabao di ambtenaar? Mi a puntra si dia 21 di juni 2021 cu Husticia a drenta DIP y confisca computer y documento, si nan ta inclui esnan di e actual Presidente di FLPD manera a sali den prensa? Fuera di ta un ehempel mas di “friends & family,” sigur no por cuadra cu integridad cu un persona ta wordo nombra Presidente di FLPD mientras tin un investigacion andando. Atrobe Minister Arends ta nenga di contesta mi preguntanan y ta den un silencio hermetico ariba e asunto. Te hasta si e kier punta dede ariba Minister di Deporte cu ta su deber contesta, e ta na altura di tur e bagabunderianan aki y no ta tuma accion. Atrobe como Minister di Integridad ta su deber percura cu tur cos cana segun procedura y esaki no a sosode.
Minister Wever a resulta di ta nada diferente, dia 18 di januari 2022 mi a manda x33 pregunta pa MinEZCDO tocante e mediaraad cu gobierno a menasa di introduci. Despues di a reuni cu varios profesional di nos prensa liber, a yega na mi atencion cu gobierno ta bezig ta censura usando fondonan publico. E uzo di fondonan publico pa haci politica ta un forma di censura y ta completamente contrario na un maneho di comunicacion integro. Gobierno su comunicadonan mester ta limita na comunica nan maneho, no ataca oposicion cu placa di pueblo. No ban papia mes con gobierno ta exclui cierto media y dirigi e gran parti di fondonan publico na empresanan cu ta sostone gobierno, algun di cual no lo existi sin e transferencia di placa di pueblo pa tene nan na bida. Dia 31 di januari 2022 Minister di Comunicacion a pidi dies dia habil mas pa contesta mi preguntanan pero e contestanan nunca a yega y mescos cu Minister Arends el a bay den silencio. Dia 22 di februari mi a manda un recordatorio y te awe mi ta warda riba un contesta. Hopi tristo mira e ministernan di RAIZ un pa un sucumbi y bira parti di e mesun politica dishonesto cu nan a campaña contra.
Loading…
Reload document 
Open in new tab E desapunto den Minister Wever no ta caba eynan, recientemente e tabata den parlamento ta gaba e cuatro reformanan cu lo duna nos economia un empuhe. Esnan cu a lesa e rapport por confirma cu su cuatro puntonan di accion ta ser considera simplemente cuatro PRECONDICION pa cualkier revitalisacion economico. Mas tristo ainda ta cu e lo mester bay pidi Hulanda financia e reformanan pa nan tuma lugar paso den un presupuesto di riba 1.3 biyon, e no por haya menos cu 1 miyon pa financia nan. E mesun rapport cu ta propone e cuatro cambionan ta bisa claramente cu e cuatro precondicionnan MESTER wordo acompaña pa un maneho economico dirigi cu a keda falta, mas cu x9 luna despues di eleccion y bayendo pa x6 luna cu e gabinete nobo a huramenta. RAIZ su plan di partido a dedica unicamente un A4 pa economia, pero e tabata inclui transicion pa un sistema di belasting teritorial. Awor cu e reforma fiscal finalmente a mira luz di dia, ta parce cu RAIZ su promesa di campaña tambe a desaparece hunto cu e ilusion di integridad cu nan Ministernan tabata tin durante campaña.
Loading…
Desafortunadamente nan Parlamentarionan tampoco a resulta mucho mihor. Kamperveen a nenga di vota na fabor di un mocion di desaprobacion di e deal entre Eagle LNG y WEB a pesar di a vocifera cu e lo haci esey pa simannan prome cu el a wordo yama pa cocoloshi prome cu un reunion di Parlamento cu a cuminsa dos ora laat. Prome cu guera caba e prijsnan di gas a fluctua 1000% y awor cu e realidad nobo di guera y e eventual exclusion di petroleo y gas Ruso, e deal (cu te awe ningun hende a wak incluyendo Sr. Kamperveen) lo resulta desastroso pa Aruba y un peso mas ariba pueblo.
Loading…
Lider di fraccion, Misha Raymond, a sigui cu e tendencia di su coleganan pa desapunta. Transparencia ta algo cu a resulta no importante pa su persona y awor cu Parlamento lo trata modifica Staatsregeling pa por introduci un Ombudsman ta parce cu e no lo para pa pueblo y exigi cu e mesun 2/3 di Parlamento necesario pa apunta e persona ta necesario pa baha e persona. Awor e rol di un Ombudsman ta pa ta critico di gobierno, pa sigura cu e no ta un nombracion politico, 2/3 di Parlamentario mester vota na fabor pa nombra e persona. Coalicion kier pa un mayoria simpel di 11 Parlamentario por bah’e, boso bisami con un Ombudsman por opera efectivamente si e tin cu biba cu e menasa cu cualkier gobierno por bah’e? Awor tin argumentonan ilogico ta bisa cu si un gobierno dicidi di baha un Ombudsman nan no lo tin 2/3 pa apunta uno nobo. Esaki ta un argumento sin sentido comun paso si gobierno dicidi di baha e Ombudsman paso nan ta hay’e mucho critico p.e., nan no lo tin ningun problema pa e puesto keda bashi, asina nan a resolve nan problema. Di berdad ta parce cu ta casi contra gobierno su religion haci lo corecto pa pueblo, nan kier haci window dressing pa mustra cu nan ta trece cambio p.e. a traves di un ley di screening, ombudsman etc. Pero en realidad nan ta keda formalidad sin djente pasobra nan no ta dispuesto di realmente crea institutonan cu por funciona adecuadamente liber di politica, kisas nan tin miedo di perde control berdadero?
Awor mi ta compronde cu RAIZ ya caba a perde 1/3 di su candidatonan, mas cu cualkier otro partido. E traicion di nan 5474 votadonan ta lamentabel, pa no papia mes di e otro 14,165 votadonan cu a vota contra politica tradicional pa despues ser desapunta cu e un partido no tradicional cu a forma coalicion a resulta peor cu nan. Mi ta spera e candidatonan number 5 en adelante busca cas nobo pa e eleccion venidero pa nan talento no bay perdi. E di dos grupo mas grandi di votado a vota contra e dos partidonan grandi y mi ta pronostica cu den e proximo eleccion nan lo ta e grupo mas grandi. Loke no por ripiti ta e fracaso di Arends, Wever, Raymond y Kamperveen di NO representa nan dignamente y cu balentud.
Loading…
