Ta parce cu ta birando normal den politica pa fix e hendenan cerca di bo cu trabou den gobierno sin cu tin e preparacionnan necesario. Esey ta netamente locual ta di condena. Miguel Mansur ta lider di partido y lider fraccion Accion 21 den Parlamento di Aruba. Recientemente el a dirigi un carta na Minister Dangui Oduber kende ta encarga cu e cartera di Salud Publico y Turismo. Un di su prome preguntanan tabata riba e echo cu a yega na su conocemento cu e cantidad di asina yama ‘arbeidscontractant’ na DVG a subi gradualmente. Ta sospecha cu e minister en cuestion ta bezig cu maniobranan politico y ta acomoda su hendenan eyden.
Mansur no a ta laga esaki pasa sin mas y a dirigi un lista di pregunta na e minister. No ta Oduber su ta bezig cu actonan asina sino Minister Xiomara Maduro tambe a fix su hendenan den DIMP. Na banda di esey, Mansur ta ocupa ta manda diferente pregunta na varios otro minister relaciona cu fiestanan di fin di aña. A dirigi pregunta caba na Minister Oduber, Arends y Maduro. Lider di Accion 21 kier sa cuanto pueblo a paga pa tur e fiestanan di fin di aña. Si mira AZV so, ta papia di un suma di casi 50 mil florin p’un fiesta locrativo riba Renaissance Island cu banda priva. Esaki sigur no ta na su miho momento mirando cu mientras ta corta den cartera di pueblo, di otro banda ta fiesta na grandi. Tambe e parlamentario tabata hopi skerpi riba e funcionamento di e director di AZV, esta Edwin Jacobs.
Informacion cu a yega na Mansur, ta papia cu di mas o menos binticuater reunion cu stakeholdernan den salud, e director di AZV a atende no menos di solamente dos di nan. Esaki sigur no ta sigura cu e departamento por funciona optimalmente. Mansur tambe a puntra riba e echo cu ta mira e director di AZV, kende ta ex-parlamentario pa e partido MEP, cu a mir’e ta biaha frecuentemente pa Colombia. E lider di partido Accion 21 kier sa si e biahenan aki tabata relaciona cu trabou of si ta biahe priva. Apart di esey, a yega na su conocemento cu AZV a cumpra un mesa VIP pa e fiesta di Kiwanis, cual el a puntra e minister di salud publico pa verifica si e echo aki ta cuadra cu realidad si of no. Di parti di 24ora.com, a acerca e director riba e echo aki y el a nenga rotundamente di a cumpra mesa pa e fiesta di Kiwanis cu fondo di AZV.
Na banda di e minister di salud, Miguel Mansur a manda pidi Minister Geoffrey Wever algun rapport di investigacionnan cu a haci den entre otro Setar, Post y su envolvimento den un caso andando, caminda ta papia di conflicto di interes di marca mayor.
Tocante Miguel Mansur
Miguel Mansur ta un inversionista cu a bira un politico, despues di funda su mesun partido. E ta boga pa un politica nobo cu gobernacion confiabel na Aruba cu di berdad ta traha pa pueblo. El a studia na Serie Colorado School na Aruba, despues a sigui International School of Aruba, despues a sigui Institut Le Rosey y finalmente a caba Tufts University na Medford, na Massachusetts, na Merca. El a caba e estudio di International Relations and Economics. Desde october 2020, Mansur a funda Partido Accion 21, a participa den eleccion na juni ultimo y a logra no menos di 2019 voto riba su nomber.
