Miguel Mansur, lider di ACCION21, a presenta na Urna 12, esta Scol Basico Washington, den compania di su simpatisantenan y su famia, p’asina e deposita su voto.
El a expresa cu e ta hopi contento, a cuminsa p’e cambio, un cambio pa miho, caminda tur ciudadano lo biba miho, un cambio di Parlamento y lo mira e balansa di poder pasa pa un otro signatura y un otro coalicion. Esey ta haci Mansur hopi contento.
Segun Mansur e lo bay bek na su sede duna algun entrevista y haci algun yamada, pero despues e lo bay tuma su dia hopi trankil, sperando anochi pa ora resultado drenta.
E ta sigui conta cu e ta hopi positivo. A haya hopi bon acogida durante henter campaña y cerca hende di tur edad. Mester ta hopi mas leu como pais, nos recursonan ta suficiente pa tur hende biba miho. E partidonan den gobernacion tabatin su tempo pa haci nan best, nan a purba, pero no tabata suficiente pa nan bolbe. Awo ta cuminsa cu e cambo p’e proximo period, uno hopi positivo. Mansur ta keda hopi optimista y anochi lo ta celebrando en grande.



Si ACCION21 drenta gobernacion, no lo ta aceptabel pa tin pobresa den e pais aki. Uno ta pa acorda cu e rijkswet, atende cu costo di bida, hisa pensioen, regula e población indocumenta, ta cosnan cu por logra den e prome 100 dianan.
ACCION21 ta habri pa traha cu tur, pero ta priorisa e partidonan independiente. Loke el a sinti den pueblo, nan kier cambio. Cambio no por ta treciendo e mesun partidonan en e gobernacion actual. ACCION21 ta habri pa traha cu tur Partido. Aunke obviamente nan tin nan preferencianan, pero pueblo lo guia ken nan kier mira forma e proximo gobierno awe nochi y Mansur ta kere cu lo mira un cambio completo.
Mansur: “Comunidad di Aruba, haci uzo di boso derecho di voto. Uza boso poder, sino otro hende lo dicidi pa boso. Vota huiciosamente, scoge pa cambio y scoge pa nos tur biba miho. Vota ACCION21.”