Migracion na punto di explota cu personal malcontento

E situacion na Departamento di Migracion ta hopi tenso, cu empleadonan malcontento, no solamente pa e aspectonan huridico di nan trabou, pero e ambiente den cual nan ta trata. Segun nan a bisa 24ora.com, nan a bin ta tolera hopi pa amor pa trabou pero ta yega un momento cu nan no por soporta y e situacion lo explota.

Segun e diferente personanan cu a drenta den contacto cu nos redaccion, e disgusto bou di e personal ta hopi grandi y ta wantando, pero cu cualkier momento por tende cu pasenshi a caba y ta pone trabou abou.

Un di e problemanan serio cu tin na e departamento ta cu supervisor- y IT-nan no tin acseso pa haci nan trabao debidamente. Tur acceso ta den man di un solo persona cu no ta ni sinta na airport y e persona aki no ta un ambtenaar. Ta trata di un persona cu ta traha a base di contracto. E motibo cu ta haciendo uza di un persona cu no ta ambtenaar ta debi na rapport cu parce Management Team a traha contra esnan cu tabata responsabel. E rapportnan aki, segun e funcionarionan, no tabatin base.

Funcionarionan di Migracion no tin confiansa cu un persona cu no ta ambtenaar ta encarga cu e parti di IT. P’esey nan a pidi pa laga traha un audit di e trabou di e persona, y pa straño cu e por zona, esaki a keda rechasa. Y sin duna un splicacion tampoco.
Loke tin e trahadonan di e departamento aki preocupa tambe ta e sentimento cu tin cu tur hende cu ta traha na Departamento di Migracion ta wordo mira como corupto.

Drpd: mr. Joseline Croes, Consehero di Minister, Gerald Vingal, Director di IASA, Minister mr. Andin Bikker y mr. Kathy Paskel, Director di DIMAS, durante un conferencia di prensa algun tempo pasa.

Prueba di esaki ta cu a detene y cera dos miembro di Migracion, kendenan despues mester a wordo laga liber pasobra no tin prueba contra nan. Hasta nan ta sinti nan mes menasa despues cu gerencia haya sa cu algun di nan tin contacto ainda cu e director legal ainda, esta Gerald Vingal.

Andin Ceasar Giovanni Bikker naci dia 20 di augustus 1969 ta Minister di Husticia y Migracion desde November 2017 den Gabinete Wever-Croes. Andin Bikker a participa na eleccion Parlamentario pa prome biaha cu Partido PDR na aña 2005 y a logra no menos di 1262 voto individual. Den eleccion na aña 2009 el a sigui crece y a alcansa 1621 voto riba su nomber. Den eleccion na 2013 el a casi redobla su votonan y a yega te cu 3047 voto personal. Den eleccion 2017, votadonan a castig’e pa su decision pa uni den POR y a cay den voto te cu 1086 voto individual, cu ta representa un caida di 64.3%.

Nan kier mustra tambe riba e hecho cu nan ta traha den stress pa motibo di falta di personal. Cada shift ta un problema, si un hende mester bira malo. Sin esey mes tin biaha tin funcionarionan di Migracion ta haya nan mes ta traha 12 pa 14 ora. Ta yega momento cu nan no por duna di nan banda mas pa traha tanto ora extra. Si e Minister encarga no tuma acccion, cualkier momento e situacion ta bay explota.

Noticia relacionaMas for di e autor