Tur siman, miembronan di United Farmers Aruba (UFA) ta haci nan bishita semanal na e miembronan di e organisacion. Esaki ta sosode riba tur diasabra pa 5’or, una nan ta cera conoci cu un ke otro cunucu. Actualmente e organisacion aki tin 19 miembro.
Meta di UFA ta pa yuda e cunukero bay p’adilanti y sostene otro pa nan yega na nan meta.
E biaha aki, UFA a bishita Cunucu di Jimmy, cu ta hopi conoci den comunidad pa e diferente productonan cu e ta cultiva. E biaha aki e miembronan di UFA a bay y conoce e dragonfruit.
Cunucu di Jimmy
James “Jimmy” Ramos, a guia e miembronan den su cunucu y mustra nan loke e tin y tambe laga nan purba e fruta aki..
Jimmy mes ta miembro di UFA. E ta contento di ta parti di dje, pa asina sostene e agricultornan di Aruba. Dragonfruit ta un producto nobo, cla pa exporta for di Aruba. Fuera di e miembronan di UFA, Jimmy a haya bishita di parti di Minister Rudy Lampe, como tambe parlamentario Ricardo Croes.
Jimmy a cuminsa cu su cunucu na 1994 y a registra na 1997. Den bon y den malo e ta cu su cunucu y awe e ta contento cu a logra bin cu un asociacion di agricultor na Aruba.
E ta spera cu lo bay logra nan metanan pa nan por ta autosostenibel na Aruba. Manera cu tur hende por wak, Venezuela a cera su porta pa motibo di e situacion caotico cu nan tin. Pero nos por na Aruba. Pero cu poder di Dios y cu tecnologia por logra hopi. Jimmy ta pidi pa aporta na loke ta dibo. Bin purba bo dragonfruit na Cunucu di Jimmy, unda cu bo por purb’e por nada. E ta bon pa combati sucu y pa e atleta, no papia mes, el a splica.
UFA
Gregory Fung-A-Fat ta presidente di UFA y ta contento di a mira cara y miembronan nobo. Tambe ta contento di wak un di e plantacionnan mas grandi di Aruba, cu diferente tipo di berdura y fruta. Jimmy ta conoci pa su plantacion di dragonfruit. Segun Fung-A-Fat e ta number dos di e cunukeronan di Aruba. Si bira un miembro, esaki ta un di e cosnan cu nan ta promove pa conoce otro, riba un otro nivel.
Un di e metanan di UFA ta pa wak kico ta e preocupacion di nan miembronan. Ta pa e motibo aki nan ta bay cerca nan y papia cu nan den un comunidad estrecho.
Vice presidente di UFA, Jareth Vermeulen, kende tambe ta vocero di e organisacion. Manera ya menciona, nan tabata cu nan bishita semanal di e cunucunan na Aruba. E organisacion aki ta traha cu e meta pa percura pa e cunukeronan bay dilanti y UFA tey pa yuda. Na Cunucu di Jimmy, no solamente e tin e dragonfruit, pero e tin su bonchi largo, figo entre otro, fuera di mas fruta y berdura cu e ta cosecha. Idea di UFA ta pa tin tur cunukero cay bao di e organisacion, pa asina cu tin cualkier problema, of tambe nan tey pa yuda nan sali padilanti.
E organisacion ta fuerte y si tin cunukero kier bira miembro of cualkier persona cu ta interesa pa agricultura di Aruba y yuda esaki bay dilanti, por bay riba nan pagina di Facebook, cu ta di United Farmers of Aruba of tambe via email, cu ta [email protected], tambe por tuma contacto cu Vermeulen via celular 5663597.
Bishita di minister
Minister di enseñansa, ciencia y desaroyo sostenibel, Rudy Lampe tambe tabata tey presente na Cunucu di Jimmy. E ta sumamente gradicido pa e invitacion pa bin na Cunucu di Jimmy, unda cu el a splica con mey mey di un situacion desfaborabel pa loke ta awa, casi desertico na Aruba, toch, mira cuanto cos e ta produci. El a splica tambe e pitaya, manera cu ta wordo menciona, con esey a bira algo asina productivo cu e por sostene e y sostene su famia.
Esaki ta un prueba cu ta posibel. Agricultura por ta un instrumento pa defende nos famia y p’esey mes a haci acto di presencia pa mustra solidaridad cu nos agricultornan local. Pasobra un desaroyo nobo pa Aruba no por ta posibel sin inclusion di nos agricultornan local, cu pa hopi aña ta lucha por ehempel cu scarsedad di awe.
Ta sclama pa apoyo, pa ayudo, entre otro di gobierno, di nos companianan di utilidad, di otro formanan, di apoyo pa nan por sobrevivi y p’esey mes segun e minister, na prome luga mester bin nos agricultornan local y un palabra di felicitacion sigur na famia di Jimmy cu a sosten’e y tur nos agricultornan local, cu trabao duro berdad, cu toch a persevera den bon y mal tempo, a persevera y awe por ehempel Jimmy ta cosecha su frutonan y merce henter apoyo di full nos comunidad, e minister a comenta.
