Miembronan di Aruba Radio Club cu training na Bureau Rampenbestrijding Aruba

Temporada di Horcan a cuminsa. Miembronan di Aruba Radio Club pa e motibo aki tambe ta prepara pa cualkier eventualidad. Rubin Ponson, miembro di directiva di Aruba Amateur Radio Club, a splica cu miembronan tabata na Bureau Rampenbureau, pa asina sigui un training pa loke ta trata oranan di emergencia, vooral pa e temporada di horcan.

Awe nan tabata bezig cu un training pa e radio amateurnan tambe, unda nan mester por posiciona nan mes y con e sistema di comunicacion lo bira den caso di emergencia di comunicacion.

Ponson a sigui splica cu tur aña lo ta bon pa haci’e, mirando e luganan cu tin posibilidad di cambia, posicionnan ta cambia, e sistema di comunica por cambia y ta bon pa un refreshment course turma luga tur aña pa por sigui tene e sistema di comunicacion bibo.

Duda

Segun Rubin Ponson, pa radio amateur mes, tin un grupo activo cu normalmente henter aña ta bezig cu radio, cu antena, etc. Ta experimentando cu esakinan. Si e duda grandi ta, cu na momento cu tin un calamidad ta tuma luga, sea un horcan of cualkier otro cos cu no tin comunicacion mas, e ta bira poco dificil y esey ta locual cu no a pasa ainda, en todo caso na Aruba, cu por midi esey. Esey ta keda semper e duda, te con leu por yega na momento cu e comunicacion ta cay completamente. Ta e momento ey ta caminda cu radio amateur ta e unico cu por bin pone comunicacion bek.