Despues cu e lider di PPA a anuncia recientemente su decision pa retira, awo el a manda un carta pa Prome Minister mr. Mike Eman pa e por keda algun dia mas.
Esaki ta simplemente pa motibo cu e procedura di su retiro y nombramento / huramentacion di su reemplasante (Eduard Pieters) no a keda cla. Inicialmente e retiro lo mester a drenta na vigor entrante awe.
No solamente e decision di Otmar Oduber pa retira e yega di sorpresa, pero practicamente riba man. Apenas ocho dia prome cu fin di luna, aunke cu e ta bisa cu e tabata na tempo, no a logra keda cla cu su reemplaso.
Pa e puesto aki no keda vacante mientrastanto, Oduber a haya su mes obliga di manda un carta na prome minister, informando cu e partidonan envolvi mester di mas tempo pa finalisa e proceso aki di un forma cauteloso. E no ta haya cu ta responsabel pa laga e fraccion di PPA sin un representante, a pidi pa pospone e fecha di su retiro. Y a pidi pa move esaki pa dia 6 di october. Y informando cu e por ta mas prome tambe, si e miembro nobo keda cla.
Tocante Otmar Oduber
Na november 2017, Otmar Oduber a ocupa e puesto di Minister di Desaroyo Teritorial, Infrastructura y Integracion. E tabata e prome mandatario di pais Aruba cu a sinta tres termino sigui tras di otro, Gabinete Mike Eman I, Gabinete Mike Eman II y Gabinete Wever-Croes.
Otmar Oduber a aparece pa prome bes riba lista politico na aña 1997 cu Partido AVP y na december 2016 a funda su mesun partido, Pueblo Orguyoso y Respeta (POR). Den nan prome eleccion na aña 2017, combinando forsa entre Otmar Oduber (AVP), Marisol Lopez (MEP-AVP) y Andin Bikker (MEP-PDR), e partido di 29 candidato a logra 5531 voto.
Votonan individual:
Eleccion 1997 – AVP – 555 voto
Eleccion 2001 – AVP – 313 voto
Eleccion 2005 – AVP – 918 voto
Eleccion 2009 – AVP – 1647 voto
Eleccion 2013 – AVP – 4008 voto
Eleccion 2017 – POR – 1808 voto
Otmar Oduber ta naci na Aruba dia 7 di augustus 1972 y ta di tres yiu di Rudy y Clara Oduber. E ta tata di 4 yiu.
