Junior Chamber International (JCI) den su kongreso mundial ku a tuma lugá resientemente na Talinn, Estonia a skohe diferente miembronan di direktiva. Entre otro Vise Presidentenan ku ta enkargá ku diferente otro organisashonnan nashonal di JCI rònt mundu.

Na Kòrsou nos por ta sumamente orguyoso di tin kuater (4) puesto riba nivel internashonal pa aña 2020. Entre otro miembro di JCI UC, Silvetty de la Paz, a ser nombrá Vise Presidente 2020. Pa por yega na e nombramentu aki, Silvetty mester a presentá un caucus kaminda e ta splika su vishon pa e aña binidero. Tambe e mester a defendé su mes. Ela hasi esaki di un forma estupendo i a skor A+, kual ta e skor di mas haltu i niun otro kandidato no a logra esaki e aña aki.

Silvetty de la Paz tin shete aña komo miembro di JCI United Citizens of Curacao (JCI UC). I den su karera ela sirbi den direktiva di su kapítulo den varios funshon. Despues ela sirbi den direktiva di JCI Dutch Caribbean, entre otro komo e presidente. I awor e ta bai pa e reto di Vise Presidente Internashonal.

JCI Dutch Caribbean ta konsistí di seis kapítulo riba Aruba, Boneiru i Kòrsou. JCI su meta prinsipal ta pa trese kambio positivo den komunidat dor di ehekutá diferente proyekto i evento ku ta aportá na komunidat di Kòrsou den un forma positivo i duradero. Tur esaki ta kuminsá na desaroyo personal, kreando lidernan kapasitá den komunidat. Tur persona entre 18 i 40 aña di edat ku ke ta siudadano aktivo por bira miembro di JCI.

Djadumingu último miembronan di JCI na Kòrsou a bai risibí nan representantenan na Airport despues di nan yegada for di e kongreso mundial.

Comments

comments