Michelle Floyd ta lansa un No Hit No Run pa Venezuela derota Brazil 1-0

E di XIII campeonato femenino mayor di WBSC/CONSURSA a continua riba veldnan na Pos Chiquito.

Aruba Softball Bond cu “tiki” recurso ta hasiendo cosnan grandi pa deporte. Aruba pa promer biaha den historia di softball ta “cede” di un evento asina grandi aproba pa WBSC y CONSURSA. Den un tanganaso di partido e pitcher di Venezuela Michelle Floyd ta “shut down” e bateria di Brazil lansando un “No Hit No Run” y ta gana e partido cu e score minimo di 1-0. Venezuela 1 careda, 3 hit, 2 error y ta laga 4 coredor den circulacion. Brazil 0 careda, 0 hit, 1 error y tambe ta laga 4 coredor na base.

Mihor bateadornan pa Venezuela ta Estefany Duno 2-1, Denisse Fuenmayor 3-1 y Ana Gonzalez 1-1. Michelle Floyd ta bay 7 inning completo lansando 47 bola, 72 strike pa un total di 119 pitch ponchando 8 bateador y ta regala 2 base por bola pa un ERA di 0.00 pa seya e victoria riba su nomber.

Fernanda Shiroma di Brazil por mira atras riba un gran labor y bon performance lansando 21 bola, 59 strike pa un total di 80 pitch propinando 4 ponche y ta regala 1 base por bola. Mester accentua cu Venezuela a caba di regresa di Mundial di Softball na Chiba Japon cual a tuma lugar na Augustus ultimo y ta un equipo di un nivel mundial.

Aruba gozando di un espectaculo nunka bisto y aunke cu un presupuesto hopi limita Aruba Softball Bond ta hasiendo cosnan grandi y ta di spera cu gobierno por duna su aporte cumpliendo cu su deber invertiendo den futuro di nos nacion. Campeonato Internacional un exito retundo te cu awor.