Recientemente Kiwanis Club of Palm Beach Aruba a instala su directiva nobo pa e aña 2019-2020. Tabata un ceremonia masha elegante, den cual miembronan ta bisti tuxedo, pa presenta e directiva nobo cu mester hiba e club di servicio na e siguiente nivel di crecemento, desaroyo y di presenta proyectonan ma comunidad.
E directiva nobo lo consisti di:
• President – Ivan Ng
• Secretary – Ross Brezovar
• Treasurer – Frank Hoevertsz
• Vice President – Rothmar Coenraad
• President Elect – Richard Roy
• Immediate Past President – Michel Janssen
• Director – Carlos Tapias
• Director – Bert van der Horst
• Director – Daniel Aguirre
• Director – Misha Bemer
• Director – Gilmar Chejito Croes
• Director – Giovanni C.V. Bermudez
• Director – Ben King
Na e ocasion aki e Presidente saliente, Michel Janssen, den su discurso a expresa su gratitud pa e esfuerzo grandi cu e miembrecia a haci den e aña anterior pa duna sosten na comunidad. Tabata un aña pa e club cu a conoce un cantidad di tres evento pa recauda fondo, esta e Kiwanis Carnival Masquerade Party, e Kiwanis Carnival Fundraising Tent y e Kiwanis Nostalgia 60’s Party. Conhunto, pa medio di e iniciativanan aki a logra recauda alrededor di Afl. 190.000,- cu a distribui entre donacionnan y proyectonan social pa comunidad.
Como Presidente nobo pa e aña 2019-2020 a instala Ivan Ng kende ta miembro desde aña 2013. E Presidente nobo den su discurso a afirma su dedicacion personal na e concepto di servicio pa nos comunidad. Tambe el a señala con orguyoso e miembronan di e club hunto cu nan famia mester ta di e resultado di nan dedicacion na comunidad. E voluntarionan ta dedica hopi di nan tempo pa yuda comunidad tur aña.
Como Presidente di Kiwanis Club of Palm Beach e lo sigui cu e ehecucion di e plan strategico vigente, unda lo enfoca ariba proyectonan basa riba resultado di un “Community Analysis” cu e club a caba di realisa y a presenta na tur esnan presente durante e anochi menciona. Den e proyectonan aki lo incorpora e elemento di educacion cu ta un di e puntonan cu mas a resalta di e estudio haci. Asina e aña aki lo sigui fortifica e sosten di e club na nos comunidad.
E instalacion a tuma luga den e ballroom di Hyatt Regency Resort den un ambiente ameno y placentero dirigi pa Patrick Brown cu a fungi como e maestro di ceremonia. Como invitadonan special tabata presente Marlon der Meer, Lieutenant Governor di Division 26, cu ta e division cu Kiwanis Club of Palm Beach ta forma parti di dje. Tambe representantenan di otro clubnan di Servico na Aruba, entre otro e organisacionnan hubenil manera Cirkle K di Universidad di Aruba, Builders Club di Colegio San Antonio, Terrific Kids di St. Dominicus y St. Franciscus College.
Kiwanis Internacional ta un organisacion caritativo mundial, dedica na haci nos mundo miho door di cambia un comunidad of un mucha cada bez. Pa mas informacion por click riba: www.facebook.com/kiwanispalm beacharuba