Michael Lampe, Diplomatico Cultural di Aruba, a duna dos discurso na MONDIACULT di UNESCO na Barcelona riba Importancia di Cultura y Transformacion Digital y Inteligencia Artificial (AI), caminda el a comparti escenario cu diferente minister y diplomatico di rond mundo.
Lampe a subraya riba e importancia p’e islanan: “Pa islanan manera Aruba, transformacion digital no ta un escogencia, e ta sobrevivencia. Den e ecosistema digital, diversidad di idioma no ta un decoracion; e ta identidad.”
Lampe a papia di coleccion.aw, e portal nacional di herencia di Aruba su desaroyo den colaboracion cu Internet Archive, caminda mas di 180.000 articulo ta disponibel online.
Den su discurso riba AI, Lampe a papia di e model Hooiberg, crea pa Archivo Nacional di Aruba cu ayudo di Biblioteca Nacional y e studiantenan di Universidad di Aruba y basa riba e plataforma Transkribus. E modelo aki ta yuda pa haci e documentonan Colonial skirbi na man lesabel, accesibel, transformando AI den un instrumento pa memoria y accesibilidad.
E mensahenan di Lampe ta alinea cu e prioridadnan resalta den e ultimo rapport global di UNESCO riba cultura, incluso amplia accesibilidad y inclusion den era digital, proteha diversidad linguistico online, y stimula cooperacion internacional pa crea un ecosistema digital inclusivo pa cultura.
El a cera su discurso cu un refleho ariba diversidad di Aruba: “Biniendo di Aruba, un isla chikito di 180 kilometro cuadra, cu mas o menos 110.000 habitantenan, pero cu mas di 90 nacionalidad cu ta biba hunto den paz, mi ta hiba cu mi e experencia di un luga caminda hopi cultura, idioma y tradicion ta coexisti. E realidad ey a forma mi manera di wak mundo: diversidad no ta algo pa tene miedo di dje, sino un fuente di forsa. Y esey mes ta loke ta trece nos hunto aki na Mondiacult: pa reafirma cu cultura, den tur su diversidad mester guia e transformacional di nos tempo, yuda nos pa carga memoria pa dilanti, fortalece identidad, y mantene nos futuro humano.”
Tocante MONDIACULT
MONDIACULT (Conferencia Mundial di maneho di Cultura) ta e plataforma global principal di UNESCO pa maneho di cultura. E a tuma luga pa prome biaha den 1982, y atrobe den 2022, y ta e eventonan mas importante caminda minister, diplomatico y lider cultural ta dicidi riba e direccion global riba con cultura ta duna forma na paz, desaroyo sostenibel y derecho humano. E edicion recien di 2025 na Barcelona a enfoca riba con Cultura mester bira un meta apart den e United Nations Sustainable Development Goals (SDGs).
