Ora cu argumento logico no ta posibel, Minister Xiomara Ruiz Maduro ta recuri na insulto di miembronan di oposicion pa saca su curpa for di un problema simpel riba e asunto di cannabis medicinal, asina Parlamentaro Michael Lampe di AVP a mustra. E miembro di fraccion berde a dirigi un simpel pregunta na Minister Ruiz Maduro kende no a aclaria e pregunta cu a wordo haci na su persona y ora cu a insisti pa haya un contesta, el a cataloga Michael Lampe pa un bobo cu no por compronde kico ta pasando.
“Como Parlamentario mi a dirigi un pregunta na e Minister di Finansa pa haya mas claridad riba expresionnan haci pa su Prome Minister Wever Croes, kende a bisa cu gobierno ta bezig cu cannabis medicinal como pilar economico pa nos pais”. Tin miembronan di fraccion di MEP den Parlamento cu a cuestiona e tipo di preguntanan aki riba e asunto di cannabis medicinal pero na momento cu nos tin un gobierno caminda e Prome Minister a yega di declara publicamente cu e asunto aki lo por ta parti di e desaroyo economico faborabel pa nos pais, ta mas cu claro cu nos kier sa e opinion y tambe e roadmap pa implementa e plan di Minister di Economia Ruiz Maduro riba e asunto aki, di acuerdo cu Parlamentario Lampe.
Sinembargo na luga di duna un contesta serio riba un pregunta serio e mandatario a haya ta bon pa rabia y cuminsa grita den parlamento yamando e organo di parlamento pa tur sorto di nomber.
Ora cu nos ta papia di desaroyo economico, ora cu Prome Minister di e pais ta menciona esaki na prensa y na pueblo, ta mas cu claro cu pueblo mester ta sigur di loke ta pasando pa despues no wordo sorprendi atrobe pa un gobierno cu no por maneha cu sinceridad y respet pa pueblo.
Mas ainda ora c’un miembro di fraccion di RED cu ta sostene gobierno di coalicion, ta declara den Parlamento cu e tin sosten di 7 minister pa cu e asunto di cannabis medicinal, pues pa tal motibo ta logico cu ta haci pregunta na e minister di finansa y economia, riba e vision di gabinete Wever Croes relaciona cu e asunto aki.
No tin nada di raro eynan, aki nos ta trahando p pueblo y ta haci preguntana cu minister mester contesta na un manera serio, no tin motibo pa baha na e nivel aki pero esaki ta otro aspecto cu minister Ruiz Maduro ta conoci pa haci pero den e proceso aki pa ridiculisa su mes y na mes momento ta falta respet pa comunidad tambe.
Ora cu e mesun prome minister di e gobierno aki ta papia di integridad, lo ta bon pa nan realisa cu integridad no ta brinda espacio pa falta hende respet, no ta brinda espacion pa insulta otronan ya cu ora un hende ta carga responsabilidad como lider den gobernacion di e pais, nan ta prome yama pa atende tur hende cu mesun seriedad y respet.
Parlamentario Michael Lampe a señala.
