Filomena College kier stimula studiantenan pa sali y demostra kico nan ta bon den dje. Esaki ta e motibo cu a bini cu e programa “Mi talento tambe ta conta”.
Den un encuentro cu prensa e directora Raquel Lampe, a splica cu Filomena College no solamente kier encurasha nan alumnonan siña bon, e vaknan cu nan ta haya tur dia, pero tambe promove nan talento. Y di e grupo aki nan tin hopi.
A pensa riba diferente cos cu nan por bini cu ne, pero e punto di salida ta cu esaki ta algo extenso y duradero di cual hobennan por beneficia di esaki.
E programa ta consisti di diferente faceta y e prome cu nan ta cuminsa cu ne yama “E huki di talento”, cu ta un idea cu a bini di e comision encarga. Di e forma aki cada biaha ta pone un di nan (ex) alumnonan den “spotlight” pa motibo cu nan a resalta den loke nan ta bon, sea musica, artistico of deportivo.
Na e conferencia di prensa tambe tabata presente Michael Lampe di “Palms Up Record”, kende a splica riba e parti creativo di e proyecto aki, cu ta cuminsa algo masha atractivo pa e hobennan. Ta papia specificamente di e area di “music producing”. Lampe a bisa cu semper el kere den desaroyo di mucha y hobennan por medio di creatividad, por medio di expresion di nan idea- y sentimentonan. Tur esaki nan ta bay siña den un workshop cu ta na encargo di Michael Lampe.
E compania di Lampe den forma boluntario ta bay duna contribucion na Filomena College den formacion di e hobennan, por medio di programanan creativo (produccion di musica). Nan lo trece diferente profesionalnan den rap, cantamento, grabacion, etc. Laga siña con ta traha beats y cada fase di un produccion di musica.
Entre esnan presente tabata un ex alumno di Filomena College, Raygel Isabela, kende ta un musico conoci. “Aki mi a siña hopi den e añanan cu mi tabata na Filomena College, cu tabata di 2011 pa 2014. Aki e base di mi carera musical a cuminsa. Nos tabata toca den gaita y lanta banda. Mi a siña hopi y a motivam’mi. P’esey mi ta kere den e proyecto aki.” El a expresa di ta orguyoso di por forma parti di e programa y duna su contribucion.
