Aña 2020 ta yegando na su fin i no a kuminsá atendé ku pago di “Inkomstenbelasting” di aña 2019
Suskrito a wòrdu aserka pa masha hopi siudadano ku durante di último lunanan a haña bishita di deurwaarder na nan kas pa pone beslag riba nan propiedatnan debí ku nan tin un òf otro pago di belasting ku nan no a kumpli kuné.
Nos frakshon tin komprondementu pa e maneho aki di Minister di finansa, debí ku komo siudadano di e pais aki nos tur tin e responsabilidat di kumpli ku pagonan di belasting pa asina gobiernu tambe por kumpli ku gastunan di pais.
Loke a sorprendé mi persona siman pasa ta e informashon ku te ainda na ofisina di belasting no a kuminsá prosesá e asina yama “Inkomstenbelasting” (IB) di aña 2019. Ta parse ku te ainda Minister Gijsbertha no a duna outorisashon pa kuminsá prosesá e IB nan di aña 2019, miéntras ku nos ta yegando na final di aña 2020. Esaki ta un falta di rèspèt i Minister di Finansa ta trapando riba derechi di siudadanonan ku ta kumpli ku lei i entrega nan IB na tempu.
Konforme lei un siudadano mester entrega tur aña su IB i konforme lei esaki mester wòrdu prosesá i e siudadano tin di wòrdu informá si loke a ser paga ta di mas òf si e tin ku paga algu mas aserka. Siudadanonan ta kumpli i entrega nan IB, ya nan a kustumbrá ku den luna di yüni te ku desèmber nan ta wòrdu informá riba nan IB i ta risibí bek loke nan tin derechi riba dje.
Pa medio di e komunikado aki frakshon di MFK ta hasi un apelashon dramátiko riba Minister Gijsbertha pa informá komunidat ki dia departamento di belasting ta kuminsá revisá IB nan entrega i pa ki fecha esnan ku a paga di mas por risibí bek loke nan tin derechi riba dje.
No ta hustu ku pueblo ta kumpli ku lei i entrega su IB i gobiernu ta keda sin kumpli ku e siudadano dor di kontrolá su IB i informe si e tin derechi riba risibí su sèn bek. Minister Gijsbertha ku e desishon aki, di keda sin atendé ku prosesamentu di IB di 2019 ta habri porta pa e siudadano tambe keda sin paga su belasting nan di 2019, debí ku Minister no por implementá un sistema di hanchu pa gobiernu i smal pa pagadónan di belasting
Kumpli ku pueblo pa pueblo tambe por kumpli ku gobiernu, meskos ku gobiernu tin problema debí na mal maneho ku finansa, e pueblo tambe tin nesesidat finansiero debí ku gabinete Rhuggenaath a pasa medidanan ku a afektá tur siudadano.
Pueblo kier sa i MFK ta puntra, debí ku Nos Kurason ta Bati pa Kòrsou….!!!
Gilmar “Pik” Pisas
Lider di Frakshon di MFK
