Mexico, Merca y Canada lo ta sede di Futbol Mundial 2026

Awe diaranson na Moscu, durante un congreso di tur pais miembro, FIFA a eligi cede di e Mundial di Futbol di aña 2026. Tabatin dos proposicion riba mesa, pa cual mayoria di e paisnan miembro a vota pa e combinacion Mexico, Merca y Canada. Esaki ta e prome biaha cu e campeonato ta tuma luga den e tres paisnan aki. E otro pais cu a aspira e sede di e campeonato mundial tabata Morocco.

E candidatura conhunto a ricibi apoyo di 134 di e 203 federacionnan cu por a vota mientras cu su oponente a logra solamente 65 voto di sosten. E cantidad total di votonan ta debi cu Ghana no a asisti na e congreso y e paisnan envolvi no por a vota, loke ta inclui e teritorionan bao di Merca: Puerto Rico, Guam y US Virgin Islands.

E campeonato mundial di aña 2026 lo ta e torneo di mas grandi den historia di futbol, ya cu e lo surpasa 48 ekipo cu lo competi den 16 grupo di tres seleccion.

Pa Aruba e escogencia aki a cay den masha bon tera, debi cu e combinacion di Merca, Canada y Mexico ta cay den e confederacion di CONCACAF, bou cual Aruba tambe ta resorta!

 

Segun e proposicion inicial, e Mexicano y Canadesnan lo organisa 10 encuentro cada un mientras cu e Mericanonan lo organisa un total di 60 wega. Desde e cuartonan di final, e weganan lo tuma luga solamente riba teritorio Mericano. Pero e formato por cambia ainda, ya cu na final ta FIFA ta dicidi. Aunke esaki no lo ta publico te cu Mei di aña 2020.

Riba e foto por aprecia Presidente di FIFA, Gianni Infantino, Presidente di AVB, Ing. Richard Dijkhoff y Presidente di CONCACAF, Victor Montagliani, durante nan bishita aña pasa na Aruba!

Ta bon pa menciona cu tres representante di Arubaanse Voetbal Bond tambe tabata presente na e congreso historico aki na Rusia, esta Richard Dijkhoff como Presidente, Marlon Werleman como Vice Presidente y Randolf Lacle como Secretario General. Aruba hasta tabata den e comision di eleccion, cu ta un honor grandi pa nos isla, cu ultimo añanan ta conta cu un admiracion grandi di parti di CONCACAF y FIFA. Ta e mesun admiracion y respet aki a pone cu aña pasa e organisa e congreso general di CONCACAF na Aruba, cu a conta tambe cu presencia y participacion di e Presidente di FIFA!

Fédération Internationale de Football Association (FIFA)

A funda FIFA dia 21 di mei 1904 y ta e organisacion na cabes di e deporte di futbol, futsal y beach soccer, responsabel pa organisa torneonan internacional, manera e Copa Mundial, cu a cuminsa desde aña 1930 y e Copa Mundial Femenino cu a start na 1991. Su oficina principal ta na Zürich y awendia ta conta cu 221 miembro di asociacionnan nacional. Tur miembro di FIFA mester ta miembro tambe di un di e 6 confederacionnan regional, den cual a parti mundo. Nan ta Africa (CAF), Asia (AFC), Europa (UEFA), Norte-Centro America y Caribe (CONCACAF), Oceania (OFC) y Sur America (CONMEBOL).

Confederation of North, Central American and Caribbean Association Football (CONCACAF)

A funda CONCACAF dia 18 di September 1961 na Mexico City unda cu a uni NAFC y CCCF. Esey a bira e di 5 confederacion di continente bou di FIFA, cu entretanto a crece na 6 continente afilia. E miembronan cu a fund’e ta Canada, Costa Rica, Cuba, El Salvador, Guatemala, Haiti, Honduras, Mexico, Antias Hulandes (Corsou), Nicaragua, Panama, Surinam y Merca.

BancoDiCaribe
Cobertura Mundial Rusia 2018 presenta pa Banco Di Caribe

CONCACAF ta e di tres confederacion mas exitoso di FIFA. CONCACAF tin 41 miembro asocia; 27 di Caribe, 7 di America Central, 4 di Noord America y 3 di Sur America. CONCACAF ta e organo gubernamental di continentenan Norte Americano, cu ta inclui Centro America y region Caribense. Tres departamento di Guyana Frances, Nacionnan independiente di Guyana, Surinam y Guyana Frances ta miembro di e Confederacion. E funcion primordial di CONCACAF ta organisa competencianan pe team y clubnan nacional. Tambe nan ta organisa e torneonan clasificatorio di e Copa Mundial masculino y femenino.

Arubaanse Voetbal Bond (AVB)

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. Na tur ta conta cu mas o menos 3000 futbolista, cu ta haci e deporte di futbol esun mas popular riba nos isla. AVB ta responsabel pa refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord. Ing. Richard Dijkhoff ta na cabes di e organisacion, den su di dos termino como Presidente.