Meteo ta alerta pa biento duro

Servicio Meteorologico di Aruba (Meteo) ta adverti cu entrante diasabra 6:00am ta emiti un alerta pa biento y lama duro. Awenochi shelo lo ta levemente te parcialmente nubla y generalmente seco den marduga. Diasabra shelo lo ta levemente te parcialmente nubla sin awacero di importancia.

Biento:

Biento lo ta modera te basta fuerte for di direccion oost cu forsa di 4 te 5 (20 te 39 km/ora, 11 te 21 nudo). Den dia fuerte te duro, tin bez hopi duro den rafaga cu forsa entre 6 te 8 (40 te 64 km/ora, 22 te 35 nudo).

Situacion general di tempo:

No ta bay tin cambionan significante den e tipo di tempo cu tin actualmente. No ta spera awasero di importancia den proximo 24 Ora y un tempo generalmente seco lo domina. Mas leu, biento lo supla un poco mas fuerte durante e weekend aki y pa e motibo aki un alerta pa biento fuerte y lama localmente bruto lo drenta na vigor diasabra mainta 6:00am..

Condicion di lama:

Olanan di lama lo ta for di direccion oost cu haltura di 5 te 8 pia. Durante e weekend aki lama lo bira bruto cu olanan di 6 pa 10 pia. E olanan di mas halto lo ta na costanan oost, noord te Noordwest di e isla. Ta pidi usuarionan di lama y ocupantenan di boto chikito pa tene cuenta cu esaki y bay cu cautela riba lama.

Pronostico di tempo pa sobra di fin di siman:

Levemente te parcialmente nubla y generalmente seco. Biento lo ta for di direccion oost y modera te basta fuerte. Den dia fuerte te hopi duro den rafaga y temperatura max / min lo ta: 32/26