Meteo ta adverti pa biento duro e fin di siman aki

Servicio Meteorologico a emiti un alerta awe tardi pa biento duro. E alerta ta drenta na vigor mañan diabierna merdia pa 12:00pm te cu dialuna atardi pa 6:00pm. Na mes momento a emiti un aviso pa boto chikito riba lama, specialmente areanan cerca di costa oost te noordwest. E aviso pa lama bruto ta drenta na vigor mañan atardi 6:00pm te diamars mainta 6:00am.

Diferencianan di presion den region zuid di Caribe ta birando mas grandi y ta haci cu biento lo supla mas duro. Ta spera velocidadnan di biento di 23 te 27 nudo y ta anticipa cu lo por tin rafaganan cu de bes en cuando lo por yega 35 nudo (beaufort 8). Esaki lo haci cu lama tambe lo bira bruto na cierto localidadnan cu olanan di 7 te posiblemente 9 pia na partinan oost te noordwest di costa.

Ta pidi publico pa tene cuenta cu e biento duro y specialmente ta urgi usuarionan di lama y marineronan pa tene cautela cerca di costa ya cu e biento duro lo causa lama bastante bruto.