Servicio Meteorologico di Aruba (Meteo) ta pronostica cu shelo awenochi lo ta levemente te parcialmente nubla y lo ta generalmente seco. Sinembargo diasabra manece diadomingo marduga y diadomingo den dia shelo lo ta levemente te parcialmente nubla cu poco awasero breve.
Temperatura maximo lo ta di 32 grado Celsius y temperatura minimo di 26 grado Celsius.
Biento:
Biento lo ta modera te basta fuerte for di generalmente direccion oost cu forsa 4 te 5 (20 te 39 km/ora, 11 te 21 nudo). Den dia biento lo ta fuerte te duro den rafaga cu forsa 6 te 7 (40 te 61 km/ora, 22 te 33 nudo).
Situacion general di tempo:
Den e proximo 24 oranan un Ola Tropical lo pasa den nos region bayendo direccion west, cu lo pone cu temporalmente mas nubia lo pasa riba Aruba. Esaki por produci poco awasero breve.
Condicion di lama:
Olanan di lama lo ta for di direccion oost cu haltura di 5 te 8 pia cu e olanan di mas halto na costanan oost, noordoost te noordwest di Aruba.
Tempo tropical significante:
Beryl, awo tormenta tropical Beryl tabata ubica na 975 km oost-zuidoost di e islanan mas oost di Caribe y ta moviendo west-noordwest cu 28 km/ora. Biento mas fuerte rond di e centro ta di 85 km/ora. E sistema aki no ta un menasa pa nos region. Sinembargo, Departamento Meteorologico di Aruba lo sigui su desaroyonan di acerca.
Depresion Tropical nr.3 tabata situa zuid-zuidoost di Cape Hatteras na North Carolina y no ta moviendo actualmente. Cu biento mas fuerte rond di e centro di 55 km/ora, e sistema aki no ta forma peliger pa nos region.
Pronostico di tempo pa comienso di siman:
Parcialmente nubla cu chens riba poco awasero local. Biento lo ta for di direccion oost y modera te basta fuerte; Den dia fuerte te duro den rafaga; Temperatura max / min lo ta: 33/27
