Meteo: Alerta pa lama bruto y biento duro

Servicio Meteorologico (Meteo) a emiti un alerta pa boto chikito, biento duro y lama bruto, cu ta drenta na vigor desde Diasabra mainta 6’or y lo sigui vigente te proximo aviso. Areanan afecta ta principalmente costa noord te noordwest, costa di Arashi, High Rise y Low Rise Hotels.

E motibo di situacion di tempo

Biento duro causa door di un area di presion halto riba ocean atlantico y un area di presion abou riba e parti noord di Colombia lo percura pa biento fuerte te hopi duro den region local. E biento aki lo combina tambe cu labaderanan modera cu ta biniendo for di oost- noordoost y esaki lo haci parti di nos costanan relativamente bruto cu olanan di 8 te 10 pia. Por spera biento di 20 pa 25 nudo cu rafaga cu por yega 35 Nudo (beaufort 8).

Accion de precaucion

Usuarionan di lama, ta adverti specialmente doñonan di boto chikito pa tene cautela riba lama grandi y cerca e area di costanan menciona. E biento fuerte por pone cu e objetonan liviano por bula den aire y bira peligroso. Vehiculonan halto y cu ta lastra trailer mester maniobra cu cautela.