Un rato pasa pa 5:00pm, Servicio Meteorologico di Aruba (Meteo) a emiti un alerta pa biento duro cu ta na vigor te diaranson atardi 6:00pm. Tambe un aviso pa boto chikito riba lama habri, specialmente pa areanan na costa oost te noordwest tambe ta na vigor y lo keda valido te diahuebs pa 6:00am.
Tempo:
Awe anochi: Parcialmente nubla cu chens pa awasero pasahero den marduga. Mañan lo ta parcialmente te hopi nubla cu chens pa un awasero breve.
Temperatura maximo: 33 grado celsius
Temperatura minimo: 27 grado celsius.
Biento: Modera te fuerte for di direccion oost cu forsa 4 te 6 (20 te 50km/ora, 11 te 27 nudo) den dia duro te posiblemente hopi duro den rafaga cu forsa 7 te 8 (51 te 74km/ora, 28 te 40 nudo)
Situacion general di tempo:
Humedad den atmosfera regional lo por causa awasero riba cierto parti di nos isla durante e proximo 24 oranan. Mas leu por bisa cu stof fini den aire lo stroba visibilidad durante proximo dianan.
Diferencia di presion den area di Caribe lo ta relativamente grandi durante proximo 2 pa 3 dia. Esaki lo causa biento mas fuerte, motibo pa cual a emiti un alerta pa biento duro.
Condicion di lama:
Olanan di lama lo ta for di direccion oost cu haltura di 3 te 7 pia. Un aviso pa boto chikito ta na vigor y ta pidi ocupantenan di boto chikito pa bay cu cautela riba lama, specialmente na parti oost te noordwest di costa.
Pronostico di tempo pa proximo tres (3) dianan:
Parsialmente nubla cu posibilidad pa awasero pasahero. Biento lo ta modera te fuerte for di generalmente direccion oost. Den dia duro te posiblemente hopi duro den rafaga. Temperatura max/min lo ta: 33° / 27°.
