Fundacion Pa Nos Comunidad (FPNC) a cera un partnership cu MetaCorp pa duna nan un man cu transporte tur comestibel. MetaCorp a pone 3 truck di New York Laundry na disposicion pa yuda e fundacion hiba cuminda pa e famianan cu nan ta yudando. Den cada truck a bay representante di e fundacion cu meta pa entrega cada pakete di comestibel pa cada famia.
A yega na atencion di MetaCorp y Eddie de Veer, CEO di MetaCorp, cu FPNC tin nan man yen cu e aumento di famianan cu mester di comestibel door di e crisis actual y a reacciona positivo mesora. “Mi ta hay’e un tremendo iniciativa y cu placer nos ta duna un man den e momentonan aki”, asina Eddie de Veer a menciona awe mainta na Centro Kibrahacha, for di unda a sali cu e comsestibelnan pa parti na tur cu ta riba e lista di e fundacion.
Gianaika van der Biezen, Director di FNPC, a indica cu e ayudo aki awor ta haci’e mas facil p’e cliente, pasobra nan no tin cu sali pa busca e paketenan. E fundacion tabatin 200 pakete riba lista pa entrega y a parti esaki segun bario. Den cada cas tin diferente constelacion di famia, esta di 1 te cu 6 of mas.
E personanan cu ta desea di haya yudansa por tuma contacto cu e fundacion. A traha un formulario di COVID-19 y esey ta haci un tiki mas facil pa aplica. Tambe por tuma contacto via e number di oficina cu ta 588-0002 y por manda mensahe of pregunta via whatsapp 562-4205.
Pa 11 aña e banco di cuminda ta existi y trahando cu diferente instancia, manera departamento social, FCCA, Wit Gele Kruis, Biba bo Bida y Respaldo. Tur esaki ta haci cu e fundacion ta haya un filter y nan ta sigur cu tur famia cerca nan ta esunnan den mas necesidad. Esey ta hopi importante pa sa unda ta haci donacion y na ken e ta bay. Asina aki no ta yuda un famia mas cu otro.
MetaCorp semper ta informa pa mira con pa duna bek na comunidad y a haci esaki e biaha aki entre FPNC y New York Laundry. Prome cu e situacion di Coronavirus, ya FPNC tabata yuda alrededor di 150 famia den necesidad cu comestibel. Eddie de Veer, CEO di MetaCorp, a indica cu awo ta un realidad tristo pa motibo di e crisis aki, tin mas di 1000 famia mester ayudo di comestibel.
“Nos ta aplaudi e trabou di FPNC y p’esey a bin hunto pa duna nan un man. Trucknan di New York Laundry ta cla pa ranca sali y entrega comestibel hunto cu FPNC. Nos ta recorda pueblo pa por fabor keda cas. Tambe pa scucha conseho y ordo di nos mandatarionan y expertonan, pa keda saludabel. P’asina nos sali di esaki mas lihe posibel y mas fuerte cu nunca”, asina Eddie de Veer a enfatisa.
MetaCorp ta celebrando 100 aña di existencia, como un compania netamente Arubiano y cu a conoce temponan bon y esunnan di reto. Un cos si, MetaCorp semper a sigui lucha pa bienestar di e compania, e trahadonan y di nos pais. E compania semper a y ta dispuesto pa duna bek na e mesun comunidad cu a sostene nan pa 100 aña largo.
