E siman aki e pueblo di San Nicolas a lanta cu un tremendo noticia cu planificacion a inicia pa locual lo bira construccion di un cinema cu tres sala, situa den Teatro Principal. Esaki sigur ta bon noticia pa comunidad di Aruba y San Nicolas principalmente unda cu finalmente ta cuminsa mira mas desaroyo na caminda.
Manera a wordo publica den medionan di comunicacion y rednan social, MetaCorp ta confirma cu lo bin un reapertura di Teatro Principal na San Nicolas. Esaki ta un tremendo noticia cu sigur a cay den bon tera principalmente cu comunidad di San Nicolas. E balor di e proyecto por wordo estima na 3.5 miyon florin si considera tur cos.
“E proyecto di Teatro Principal ta hopi emocionante pa varios motibo. Na augustus 1992 e teatro aki a cera su porta despues di masha hopi aña di existencia ora cu economia di nos pais tabata malo y peliculanan tabata yega Aruba laat compara cu nan estreno na Merca”, asina Eddie de Veer, CEO di MetaCorp a splica. E reaccionnan riba rednan social den cuadro cu e noticia aki ta hopi grandi. Diferente hende a expresa nan gratitud na MetaCorp pa e gran iniciativa aki, como tambe pa yuda stimula movecion economico na San Nicolas.
E prome negoshi di MetaCorp tabata cine
Ta for di aña 1920 cu a cuminsa cu e negoshi di cine, E. de Veer Chain Theatres, e tempo ey tabata den e cura di unda awendia ta Censo y Registro Civil. Na aña 1929 a habri Teatro Gloria entre Nassaustraat y Steenweg na Playa. Na San Nicolas a habri Royal, cu despues a haya e nomber di Teatro Principal y tambe teatro Cinelandia. Asina a sigui desaroya mas teatronan, manera Teatro Savaneta, Aurora na Santa Cruz, Rialto den Steenweg. Den temponan mas moderno nos a conoce Boulevard Theatre y sin lubida Drive Inn Theatre. Na dado momento e compania tabata maneha 9 diferente teatro tur rond di Aruba.
Remodelacion total di Teatro Principal
Pueblo di San Nicolas a pidi hopi biaha pa bin cu un cine pa nan y e realidad ta cu economicamente e proyecto ta cuestionabel segun MetaCorp. No obstante, circumstancia actual ta duna e compania hopi speransa cu un cine moderno di tres sala, comfortabel y cu ultimo tecnologia lo por genera suficiente cliente pa sostene su mes economicamente na San Nicolas. Teatro Principal lo wordo totalmente remodela. E tres salanan lo haya ‘stadium seating’ cu stoel amplio tipo ‘rockers’ mescos cu na The Cinema na Playa, proyeccion High Definition Digital, Dolby 7.1 Surround Sound, Super Large Screen y un concesion di alimento y bebida mescos cu The Cinema. E proyecto di Teatro Principal ta den fase final di planificacion y MetaCorp ta spera di por cuminsa cu construccion pronto.
Na caminda pa 100 aña!
Den cuadro cu celebracion di 100 aña di existencia, MetaCorp tin varios actividad y inversion na caminda, manera e proyecto di Cinema IMAX na Eagle, remodelacion completo di The Cinema na Renaissance y awor reapertura di Teatro Principal na San Nicolas cual sigur ta algo di celebra. Manera semper, MetaCorp continuamente ta contribui na instancianan social na Aruba. Di e forma aki MetaCorp ta demostra cu nan ta kere den San Nicolas y ta sigur pa sigui inverti den desaroyo continuo di Pais Aruba.
