Mas o menos 600 trahado di tur nan subsidiarionan, manera ta ATCO Aruba, ATCO Concrete Products, EcoTech, EcoGas, Tropical Bottling Company, Brouwerij Nacional Balashi, New York Laundry, The Movies Aruba y MetaCorp mes a atende un reunion general awe tardi den ballroom di Aruba Marriott Resort & Casino. Parce cu e meta di e reunion tabata pa informa tur nan trahadonan di e ultimo desaroyonan rond di e leynan nobo cu Gobierno kier pasa of kier adapta, cu lo por tin consecuencia pa operacion di e companianan.
Manera e “memo” emiti e siman aki tabata bisa specificamente, cu e ley cu Minister Otmar Oduber kier pasa den Parlamento dia 23 di september proximo, lo hinca e compania EcoTech den problema serio. E kier “obliga” tur e 6000 clientenan residencial di EcoTech pa paga 17,50 extra (riba e tarifa regular di recogemento di sushi), cu lo haci e tarifa hopi mas caro contra e Afl. 25.00 cu Serlimar ta cobrando pa luna.
Ta mas cu obvio cu mayoria cliente e ora lo bandona EcoTech pa bay Serlimar y asina via un maneho di subsidio, ta conkista e mercado bek. E unico fastioso den esaki ta, cu e Minister lo uza placa di belasting di comunidad pa proteha un monopolio, subsidia Serlimar mas ainda, pa por competi contra sector priva.
E subsidio lo bin via un aumento di impuesto cu lo cobra na turistanan kedando den hotel y Timeshare, via un “Bestemmingsheffing Serlimar voor het beheer van afval”. Di eynan e tin pensa di haya por lo menos 7 miyon florin pa aña cu lo pasa automaticamente pa Serlimar. Di e forma aki, hotelnan lo subsidia e maneho di Serlimar indirectamente.
Riba dje lo kier adapta e leynan di medio ambiente di tal forma cu lo prohibi tur compania cu ta recoge sushi, pa hiba solamente na un stortplaats di Serlimar, cu lo mester bin ainda. Te cu awor, pa mas di 1 aña caba, tur sushi ta bayendo EcoGas na Barcadera pa procesa y hinca den Envirobales pa dera den un buraco na Ser’i Tijshi. Awor kier forsa pa bin cu un incinerator, proyecto balora na mey biyon florin, pa kima sushi na Aruba. Esey lo aumenta e “tipping fee” cu por lo menos tres bez, pero mas cu esey, lo haci cu EcoGas no lo existi mas, causando e pan di e trahadonan eyden.
Comosifuera poco, Minister Xiomara Maduro no ta keda atras y awor kier presenta un cambio den nos sistema di belasting pa introduci un “Sugar Tax” cu de facto mas bien ta un “softdrinks tax” pa haya mas entrada. MetaCorp a bisa cu nan NO ta contra un “Sugar Tax” pero si e forma discriminatorio manera kier introduci esun aki. E no tin nada di haber cu salud di ciudadanonan, pasobra e fondo no ta bay pa Departamento di Salud Publico, sino e ta bay pa caha di Gobierno. E impuesto nobo aki, cu ta den e Reforma Fiscal, lo haci cu Aruba ta bira e pais cu belasting mas halto na mundo riba refresco!
Trahadonan di MetaCorp y su subsidiarionan ta sinti cu e leynan aki ta traha liña recta pa caba cu nan negoshinan. E trahadonan ta mira esaki como un menasa serio pa nan trabou. A expresa awe di ta para 100% tras di nan compania y lo kier mustra esaki tambe publicamente. Otro aña MetaCorp ta celebra 100 aña di existencia, como e compania Arubiano mas bieu di nos isla, y cu a inverti miyones e ultimo 100 aña aki den progreso y desaroyo di nos pais.
