Na momento cu Raquel Lampe, directora suplente di Filomena College MAVO, a wordo avisa cu cierto informacionnan a bay riba social media, cu expresionnan contra di e scol y e cabesante, sr. Herbert Goedgedrag, ta eroneo. Ta trata aki di un situacion caminda cu supuestamente ta wordo bisa cu maltrato di bestia ta tuma luga riba tereno di scol y cu comentarionan no menos bunita a wordo haci den direccion di e scol y su cabesante.
Sra. Lampe a sigui splica cu ta importante pa busca informacion corecto prome cu saca esaki. Riba e tereno di scol, segun e cabesante Herbert Goedgedrag a menciona den un entrevista anterior, un siman pasa un Rotweiler y un cacho crioyo yena cu sarna y sanger, a cana kibra riba e tereno di scol y a haci doño di e gang. E Rotweiler ta uno brabo y e muchanan tabata haya problema cu esaki, mirando cu esaki ta ataca tanto docente como e muchanan mes. Pa esaki, a cuminsa busca solucion cerca polis, como tambe instancianan concerni, pero no a haya e yudansa manera spera.
Raquel Lampe mes, e Rotweiler a atak’e. Ta hopi fastioso y por imagina con e muchanan tambe ta sinti nan mes. Tarea principal di e scol ta pa tene e muchanan safe. Y na momento cu ta bati na porta y no ta haya yudansa, purbando tur manera pa haya solucionnan agradabel, ta momento pa e personanan cu tin e barbaridadnan cu tin riba social media, pa sea rectifica of kita esakinan, pasobra no ta bunita. Sensacionalismo ta algo grandi. Pero pa laga tipo di comentarionan aki bay rond, no ta agradabel.
E otro cacho cu sarna, berdad el a bay for di e scol. E tabata tin e gang tur na sanger. Sa cu sarna ta algo cu ta un malesa di cuero cu por pega na hende. Pa proteha e alumnonan tambe, a busca un solucion. Ta spera cu e situacion aki ta cla y ententibel pa tur hende. E ultimo cacho cu tin awor aki riba tereno, ta den un di e kouchinan di Crioyo Trappers, cu e idea pa aloca nan. Tur hende na e scol stima bestia. Lampe mes tin cacho na cas, cu ta cuida y sterilisa manera mester ta y no riba caya. Tin cacho cu ta drenta den cura di scol cu tin banchi, cual ta nifica cu un hende ta nan doño, pero ta cana los y aparentemente hende no ta haya nan falta. Ban ta responsabel pa esaki tambe. Ban cuida nos bestianan y cu e nomber di Filomena College, keda liber di e mal informacionnan aki.
