Definitivamente departamento di planologie mester tuma e pasonan necesario pa yuda evita mas accidente na e crusada di Zoutmanstraat y Caya Mario Harms, bayendo direccion di Julianastraat. Awe den oranan di atardi ta sosode un otro accidente na e crusada aki, net dilanti di e brug chikito di lagoen.
Un Hyundai coriendo riba Caya Mario Harms a pasa e crusada cu Zoutmanstraat sin para. El a dal den un TX cu tabata coriendo riba Zoutmanstraat direccion di Julianastraat. E impacto a causa cu e Taxi a keda para cara pa Wilhelminapark, riba Caya Mario Harms, mientras cu e Hyundai a pega den un poste di coriente. Ambos vehiculo a ricibi basta daño material y un persona den e Hyundai a resulta herida.
Un dia prome caba tabatin un accidente na e mesun sitio. No ta pasa un siman sin cu tin un accidente ta tuma luga na e crusada aki. Esaki ta un señal cu Departamento di Planologie di DOW lo mester haci un evaluacion con pa mehora e situacion na e sitio. Aunke cu tin un borchi chikito poni eynan caba, tur e accidentnan aki ta mustra cu mester tuma medida adicional. No solamente esnan envolvi ta sufri daño material y fisico, pero propiedad di Gobierno y ELMA ta keda daño cu ta costa placa pa drecha. Kisas un borchi grandi cu e palabra STOP manera sa pone na crusadanan peligroso y “sleeping police” por ta un solucion.
