Mervin Wyatt-Ras: Ta lastima cu crisisplan no ta dunando e resultado priminti

Parlamentario Mervin Wyatt-Ras a tuma nota di rapport cu minister di Asuntonan Social y Labor a entrega na Parlamento titula “Rapportage Uitvoering van het Sociaal Crisisplan over de periode 1 november 2018 en 2019 en een vooruitzicht voor 2020 en 2021”.

Den e rapport ta duna bista di e proceso di ehecucion di e fondo crea pa atende cu e area social. Ta trata di un suma di 18.5 miyon florin pa anja 2019. Den e rapport ta sali for di un zgn. situacion di crisis, esta un situacion cu supuestamente lo mester actua de inmediato. Ta sali for di un situacion den cual tin un promedio di 24 caso pa luna di abuso sexual. Alavez ta sali di un situacion di 150 caso promedio di violencua domestico.

Aki e minister encarga cu Asuntonan social a uza loke a pasa cu 2 mucha pa declara cu tin crisis y cu mester actua mesora. Dor di presion a presenta un begrotingsfonds pa cual gobierno a haya aprobacion den Parlamento y por uza 18,5 miyon florin. A nombra ya caba 41 persona. Sinembargo den practica e resultado ta diferente. Den su promer raportahe na Parlamento minister a trece padilanti cu den e promer lunanan di 2019  ela uza solamente 12% di e suma den e fondo y a logra baha e lista di espera di dos anja di Sociale Zaken cu 60%. Si esey ta e caso por conclui cu djies uzando mitad di e placa cu a destina pa e plan social lo por baha e lista di espera completamente.

Kiermeen no tabata necesario tanto placa? Awor despues di mitar anja den e raportahe di dos cuartal minister mes ta indica cu solamente 3 di e 31 proyectonan (9.7%) ta bai bon, mientras cu den (90.3%) di e proyectonan segun e raport instancianan no por cumpli cu e programma vereisen. Esakinan ta rekisitonan. Pues contrario na e pensamento di un crisis e instancianan aki no ta hayando e ayudo necesario mesora pero tin cu pasa un caminda di cruz pa haya placa. Paso nan tin cu cumpli cu criterianan. For di esaki por saka afo cu no tabatin ningun crisis sino cu esaki a ser crea pa haya placa. Paso crisis ta rekeri accion mesora.

Den reaccion di CAft riba e uitvoeringsrapportage 2019 e ta critica e aspecto financiero di “Crisisplan” netamente nombracion di personal.
CAft ta indica cu e post di personal den presupuesto 2019 no por surpasa 479 miyon florin. Esaki pasobra gobierno incluyendo e minister di Asuntonan Social a firma un protocol cu Hulanda sin consulta promer cu Parlamento. Aki e mesun Minister a bai di acuerdo cu algo cu e no ta cumpli cun’e. E rapport di ehecucion di presupuesto di anja 2019 ta mustra cu den gastonan ya a yega na e suma di 478.5 miyon. Sociaal crisis plan ya caba a haci uzo di 1.2 miyon den 2019 pa nombracion di personal. Tin espacio ainda den e fondo di un suma di 3.4 miyon pa personal. Sinembargo CAft ta considera gastonan di personal cu ta ser financia dor di Crisisplan como gastonan di personal di presupuesto di pais Aruba cu ta mara na e protocol. Pa e motibo ey CAft ta considera cu e fondo di crisisplan no ta cuadra cu normanan stipula di e protocol cu a ser firma dor di gobierno.

A sabiendas di e protocol e minister en cuestion a bin cu e fondo pa crisis social.
Ta un lastima cu awor tin discucion y cu nos muchanan, nos hobennan y esnan den dificultad no ta hayando e atencion necesario cu e minister a priminti nan. No ta na su lugar cu nos muchanana ta ser uza den un batailla pa haya medionan pa nombra amigo y famianan. Nos muchanan, hobennan y famianan den dificultad no merece pa ser enganja. E efecto di e trabounan pa medio di crisisplan mester ser refleha den mas cooperacion entre instancianan, mihor registracion, referencia di casonan y synchronisacion. Un victima di abuso y maltrato no lo ser yuda dor di un solo sesion di combersacion pesey mes no ta realistico cu por elimina un lista di espera di 2 anja cu e minister a indica den tres luna. Por ganja esnan cu no a traha nunca den sector social, pero no por ganja Wyatt-Ras. Pesey mes ta un lastima cu e plan di zgn crisis aki no ta dunando e resultado priminti.

Comments

comments