Parlamentario Mervin Wyatt-Ras ta felicita y aplaudi tur nurse y esunnan liga na enfermeria ariba e dia mundialmente dedica na enfermeria. Dia 12 di mei, e fecha natalicio di Florence Nightingale, ta e dia cu ta dedica na e aprecio pa tur esunnan cu ta atende cu pashent of esnan cu mester di cuido.
E cuido aki ta ora e persona nace, ser transporta cu ambulance, haci test, haya cuido den hospital, haya guia di praktijkondersteuners, guia den centronan di cuido y di salud mental, haya guia pa ta un miho mayor dor di WGK, haya guia den tercer edad, tambe den fase terminal y guia ora ta fayece. E nurse ta multifacetico, cu no solamente ta duna trato medico, sino ta un consehero, ta consola y ta guia. En especial e gran habilidad di enfermeria a bin na cla durante cu mundo a confronta cu e virus devastador di COVID-19 na aña 2020. Aki e superheroenan den enfermeria a mustra nan cualidadnan unda cu tabata traha durante oranan largo, cu medionan y proteccion limita mas e temor di bay cas pa no contagia nan famia.
P’esey ta di importancia pa gobierno cambia su meta pa corta den cuido y no tuma medida drastico den cuido. E meta mundial di e aña aki ta Nurses: A Voice to Lead – Invest in Nursing and respect rights to secure global health. Esaki nifica cu enfermeronan ta un bos pa guia: inverti den enfermeria y respeta e derechonan pa sigura salud global. En bista di e meta aki gobierno di Aruba ta dirigi riba lo contrario. Gobierno ke corta den cuido di e pashentnan y a elimina su landsbijdrage na AZV den presupuesto 2022, locual tin su consecuencia financiero pa enfermeria tambe. Wyatt-Ras ta di opinion cu tanto e minister di Salud como e minister presidente mester ta sincero cu e veld di cuido. E ta spera cu gobierno bira transparente cu e veld ora di tuma medida.
E ora lo tin respet berdadero di gobierno pa e veld di cuido y enfermeria. Di su banda Wyatt-Ras ta di opinion cu en bes di medida mester inverti mas den enfermeria pa ekipa e nursenan no solamente cu material necesario sino tambe miho condicion laboral y upgrading pa keda mehora nos calidad di cuido. Un biaha mas pabien, hopi forsa cu e trabou y retonan.
