Durante conferencia di prensa di partido y fraccion di Avp diahuebs dia 6 di januari 2022, parlamentario drs. Mervin Wyatt-Ras a trece su reaccion padilanti riba minister Dangui Oduber. Esaki despues cu e minister na un forma emocional y erratico a ataca Wyatt-Ras den prensa despues di su conferencia di prensa di diamars ultimo.
Den e conferencia di prensa aki Wyatt-Ras a expresa su preocupacion pa loke ta trata e investigacion di e fraude cu certificado di vacunanan den DVG, e investigacion di hortamento di placa na airport ora turistanan paga pa haci PCR test. Tambe e parlamentario a expresa preocupacion pa loke ta trata crecemento di casonan di Omicron y e forma irespetuoso cu e minister a expresa pa cu director di Hospital sr. Jacco Vroegop.
Minister Dangui Oduber a reacciona na un manera emocional y eratico riba preocupacion y expresionnan di Wyatt-Ras rond di e fraude cu certificadonan di vacuna na DVG y hortamento di placa pa PCR test na airport. E minister haci como sifuera cu Wyatt-Ras ataca, lastra y insulta tur empleado y profesionalnan di DVG. Cu el a cuestiona integridad di henter departamento. Esaki no ta corecto. Obviamente e minister ta sinti su mes op zijn “tenen getrapt” y kizas tin cos di skonde pa cual motibo el a reacciona asina liher emocional y negativo. Segun Wyatt-Ras enbes di carga su responsabilidad y contesta preguntanan haci na dje e minister ta tira tur cos riba trahado.
Wyatt Ras ta trece padilanti cu su rol como parlamentario ta di controla gobierno, especialmente na momento cu ta trata placa di pueblo, na momento cu tin fraude, na momento cu tin cosnan irregular ta su deber como parlamentario pa asina haci pregunta. Wyatt-Ras ta trece padilanti cu easki el a haci tambe. El a manda un serie di pregunta pa minister y a cuestiona minister.
Wyatt-Ras a cuestiona alabes cu tin di e sospechoso(nan) cu lo ta coordinador y of campanjador di e minister. Wyatt-Ras ta haya cu como representante di pueblo e tin derecho di haci e pregunta. E minister tin e deber tambe di contesta. Oduber a tira den cara di Wyatt-Ras bisando: “bai wak den bo partido prome cuanto fraude y corupcion tin”. Esaki ta bisa mas di su mes. E kier silencia Wyatt-Ras. Segun Wyat-Ras naturalmente ora tin un gobierno of coleganan cu a goberna por bin pregunta encuanto sospecho di iregularidadnan cu por a sosode. Ta keda na OM pa investiga y na e politico pa coopera. Wyatt-Ras su coleganan a coopera cu investigacion di OM. Wyatt-Ras ta spera mescos di e minister aki cu e lo carga su responsabilidad.
Netamente esnan den e gobierno aki cu ta pretende di ta transparente y integro, kendenan a bisa cu tin integridad halto ariba nan agenda, hasta tin un buro integridad y un ministerio y minister encarga cu integridad, mester mustra cu ora ta trata nan propio seno cu nan ta transparente. Mester midi cu e mesun midi ora ta trata iregularidadnan den e gobierno aki.
E minister tin cu duna contesta ariba tur e preguntanan cu ser haci y no bira emocional of insulta, ni bai traha memes ariba facebook, skirbi articulonan anonimo y laga su hendenan tira palabra. Como hende grandi Wyatt-Ras ta spera e seriedad tambe tambe serca e minister.
Wyatt-Ras a trece alabes su preocupacion padilanti pa loke ta trata e cantidad di casonan di Omicron. Dia 20 di december tabatin e prome caso mientras ya caba dia 28 di december Aruba a drenta den e di 5 wave of ola di COVD 19. Esaki kiermeen cu e transmission, e contagio a bai asina rapido y eynan segun Wyatt-Ras e minister y gobierno tabata slap.
Na e momento ey mester a tuma cierto medida pa limitacion di contagio. E minister a permiti pa minister presidente y parlamentarionan “viva la vida loca”. Prome minister a organisa fiesta grandi di boda di su yiu y tabatin otro fiestanan tambe di otro politiconan. Na fin di anja tabatin fiestanan grandi, e.o. na Bochincha y tur hende por a mira fotonan di multitud di hende cu bai mira “vuurwerk” riba beach sin ningun rekisito di prevencion.
Awor pa 3 dia consecutivo nos tin mas cu 1000 caso nobo riba un dia y e cantidad di casonan activo ta mas halto cu 3000.
CDC di Merca a declara Aruba den Code Red dia 5 di januari. A base di e code aki e lo conseha negativo pa biahanan pa Aruba. Ya Air Canada a cancela su vuelonan y tin un cantidad di cancelacion di mas vuelo y di lugar den hotel. Esaki sigur lo tin efecto negativo riba nos turismo y economia. E minister no ta pro-activo. E mester a prepara pa loke ta bin na caminda.
