Mervin Wyatt-Ras: Malcontento den comunidad ta alarmante

Segun Parlamentario drs. Mervin Wyatt-Ras den nos comunidad ta reina malcontento cu cada dia ta bira mas alarmante y ta refleja su mes den diferente demostracion. Staten a ricibi demostracion di Trei Merdia, Metacorp y maestronan di skol. Tambe Douane a demostra.
Por constata cu e gobierno aki no ta transparente. Gobierno no ta skucha su hendenen y no ta cumpli cu locual ela priminti. Pues un gobierno cu no ta cumpli cu su promesanan dor di cual su hendenan no ta contento y ta cuminsa subi caya pa demostra. E demostracion reciente di trahadornan di Metacorp a indica cu trahadornan ta sinti cu nan pan di cada dia ta ser menasa. Tur esey tin di haber cu e ley di Serlimar cu a drenta Parlamento pa ser trata. E “landsverordening” regardando recogimento y procesamenro di sushi, presenta dor di minister Otmar Oduber cu kier a bulldoze e ley aki.

Den e ley aki lo cobra usuarionan Afls. 7,50 pa piki sushi y Afls. 17.50 pa procesa sushi (vuilverwerking). Aki esnan cu nan sushi ta ser recohi dor di un otro compania cu no ta Serlimar, den e caso aki Ecotech, lo mester paga Afls. 17.50 extra. Esaki ta un castigo y medida riba lomba di nos ciudadanonan. Ademas en bista cu segun e ley Serlimar so lo bai ocupa su mes cu procedamento di sushi y no otro compania e ley lo duna Serlimar un monopolio y e “cost of doing business lo bira asina halto cu e otro compania priva lo no sobrevivi. E chens ta alavez hopi grandi cu lo bai over na kita trahadornan. Durante e demostracion e trahadornan tabata emocional over di e asunto aki, nan tin miedo di perde nan trabou. Ta trata di mas di 6000 mil cliente cu si nan no keda cu e compania, esaki lo sufri consecuencianan financiero.

Un otro argumento ta e otro medida di gobierno ariba nos pueblo, cual ta e sugar tax.
Lo trece 33 miyon den caha di gobierno mientras cu esaki lo tin un impacto devastador ariba cartera di nos hendenan humilde y ariba e compania local cu ta produci refresco na Aruba. E sugar tax aki no ta parti di un manejo balansa riba e tereno di prevencion di obesidad of otro malesanan chronico. Introduccion di sugar tax banda di hisa prijs di bebidanan pa nos pueblo, lo hisa e cost of doing business di e compania dor di cual lo bai over na kita trahadornan. Fraccion di Avp tabatey ora cu e trahadonan a entrega un carta na presidente di Parlamento. Parlamentarionan lo mester entrega preguntanan ariba e ley no mas tarda cu dia 23 di september. Despues di esaki gobierno lo contesta e preguntanan den un “Nota naar aanleiding van het verslag” y asina cu esaki yega Parlamento e presidente di parlamento aki complaciente cu gobierno lo yama e reunion mas pronto cu ta posibel. Awor cu gobierno ta mira cuanto reaccion di preocupacion tin pa e ley ta di spera cu e recapacita pa no pusha e medida aki den stoma di nos pueblo. Paso nos pueblo no por wanta mas medida. Costo di bida a bira mas halto. Prijs di comestibles a subi, prijs di awa y coriente a bira mas halto, prijs di gasoline a bolbe subi. Asina bo por sigui menciona y sin cu gobierno ta bin cu ehercicio pa baha propio gastonan of alternativanan pa mehora nos economia. E gobierno aki mester baha cantidad di ministernan, loke ela priminti. Gobierno mester baha e cantidad di personal contrario cu loke nan a priminti e cantidad di personal a subi. CAft ta cuestiona esaki fuertemente. Tambe gobierno mester baha e cantidad di viahenan. Awor a para bira cu pa skonde viahenan di e ministernan gobierno no ta manda informa parlamento mas ora nan viaja, ni ki dia ni na unda. Di e forma aki Parlamento no por haci su trabou di controla gobierno.
Gobierno mester baha alavez nan gastonan lucrativo pa compra di autonan caro y di ultimo modelo, compra di productonan di luho, organisa fiestanan pa nan cu nan. Gobierno no tin un “versobering” pa su mes y pa esnan cu ta traha serca/cu nan pero ta skohe si pa tuma medida serca nos pueblo pa haya placa.
Nos pueblo no por carga mas. Gobierno ya caba a tuma hopi placa foi nos hendenan. Entre otro a haya 10 miyon pa accijns di gasolin, 87 miyon na BAZV,, 14.5 miyon na grondbelasting, 130 miyon na BBO.
Sin bisti mascarada, gobierno aki den dia kla ta atraca cartera di nos hendenan. Pesey mes tur e demostracionnan.
Durante e demostracion di maestronan di skol na parlamento, Wyatt-Ras hunto cu sr. Sneek y tabata presente pa fraccion. E maestronan ta fada paso tin yen di problema: MDC, klasnan mucho grandi, muchanan ta drenta eerste cu 5 anja, ke elimina Vwo 3 na San nicolaas, kier elimina Middagmavo, personal di Examenburo a baha di 20 pa 8 persona. Un maneho adhoc, un manejo cu minister ta bin impone sin tene cuenta cu e actornan importante. Maestronan ta sinti cu nan no ta ser respeta den nan trabou. Tin falta di vision y tin falta di un maneho dirigi. Minister ta tuma decisionnan adhoc y kier impone sin consulta cu veld y esey tin tur hende fada y harta y nan a mustra nan malcontento. Maestronan no kier a papia cu minister di Ensenjanza mas. Ta un lastima cu e ministro Presidente cu a papia ci e demostrantenan a keda ripiti cu tin deficit y cu no por haci mucho pa nan. Si ela combersa cu nan apart.
Maestronan a pidi na Parlamento pa bin mocion di desconfianza contra di e minister. Wyatt-Ras ta spera cu e coalicion lo para na banda di nos ensenjanza y di maestronan kendenan ta instrumentonan importante den nos ensenjanza.