Mervin Wyatt-Ras: Inflacion tin su impacto social

Mervin Wyatt-Ras ta expresa cu e anuncio di e minister di Asuntonan Social y Labor encuanto e subida di 3 % di salario minimo no ta coi gaba mirando e situacion dificil cu nos hendenan ta aden dor di inflacion cu e gobierno a crea dor di tantisimo medida y subida di prijsnan di cuminda, mercancia, bebida, awa, coriente, gasolin etc.

E gobierno aki a ganja cu tin mega debe pa por hustifica e debe cu nan mes a haci ya foi principio di gobernacion di 130 miyon florin, pa nan por nombra un cantidad di personal, haci gastonan halto di luho, etc. CAft mes a constata subida di  personal den presupuesto.

E medidadnan y subida di prijsnan ta haci cu ta saka hopi mas placa for di cartera di nos cuidadanonan. E crisisheffing, e ley di impuesto, subida di prijs di awa y coriente, gasolin, prijs di comestibles ta trece cun’e cu costo di bida a bira caro. Centraal Buro voor de Statistiek ta indica cu e “bestaansminimum” di nos ciudadanonan a subi. Esta e minimo di entrada pa por tin un bida digno a subi. Gastonan di famia a subi den menos cu 2 anja cu casi 400 florin pa luna, locual ta coresponde cu mas o menos 5000 florin pa anja. Pa hende cu ta biba su so e gastonan a subi cu 200 florin pa luna, loke ta 2400 pa anja.

Banco Central ta trece padilanti cu dor di e inflacion cumulativo di 2018 y 2019 tin un perdida di compra di mas cu 10%. E aumento di prijs di comestibles ta halto. “Over the last 12 months Food and Catering Services has increased by 10.5%. Food at home index showed increase of 12.4 %. Potatoes and other tubers index has increased by 34.9%. E aumento di prijsnan ta di tal forma cu nos hendenan no por mas. Ora bo drenta cualkier supermercado nos hendenan ta keha sea di cual salario cu ta. Nan ta expresa cu e situacion ta hopi dificil. Mamanan cu tin un salario minimo cu tin cu manda nan yiunan skol cu tin cu cumpra tur cos pa skol etc. no por kom rond. No por cumpra p.e. yoguert mas, ni tur fruta, berdura y otro cumindanan necesario. Esaki ta un concierne di nos y nos partido a marcha cu tur cu no ta contento y a entrega un manifesto na gobierno.

Ta logico pues cu empleadonan ta pidi subida di salario. Pero e subida cu 3% lo no yuda e trahado paso e lo no cover su gastonan mensual y lo pone mas presion riba comerciantenan cu lo cobra esaki den nan producto of servicionan. Ta preocupante alavez paso dunadornan di trabou no tin suficiente placa pa paga nan empleadonan y ta haya nan mes ta kita nan y hasta sera negoshi. Mientrastanto e gobierno aki no ta buscando solucion economico. E asunto di Citgo ta tranca y minister Evelyn Wever-Croes a anuncia cu e ta bai Washington y lo mester tin un deadline pa cu refineria. Minister Dangui ta menciona cu nos lo mester pensa riba plan b den caso refineria no ta un opcion mas. Segun Wyatt-Ras e gobierno aki especialmente e ministro presidente no a haci nada bisto pa lucha pa mantene e refineria. Awor dor cu nos hendenan no ta soporta e situacion e ta core bula bai pa wak kico e por haci. Ademas e ta den un dilemma entre pone un hotel na San Nicolaas y mantene un refineria. Esaki dor cu tin miembronan di su coalicion ta contra di e refineria. Wyatt-Ras ta di opinion cu solamente turismo como pilar economico pa Aruba no ta suficiente paso nos no por depende solamente di turismo.

Na varios ocasion tabatin diferente conferencia/reunion cu esey a wordo bisa. Turismo ta un pilar vulnerable. Nos ta depende di dje pa anjas y nos ta dependiendo di dje pero cualkier cos cu pasa of  problemanan cu surgi na nos pais, nos lo sinti efectonan den nos turismo. Pesey nos mester sondea otro posibilidadnan. E otro pilar segun e gobierno aki lo ta cannabis. Encuanto cannabis tin hopi discucion den coalicion. Tin ta pro pa e uzo medicinal y otro kier uzo recreacional tambe. E pilar economico cu ta di energia solvable cu gobierno anterior a traha na dje, e gobierno aki no a continua cu e vision aki. Nan kier te hasta sera TNO.

Hecho ta cu na e momentonan aki hopi hende a perde trabou. Mama y tatanan no tin pan pa pone riba mesa di nan famia. Awor aki tin un berdadero crisis. No tempo di Avp paso tempo di Avp tur hende tabatin trabou.

E situacion aki sigur tin su refleho ariba e sector social. Pasobra ora bo tin un cantidad di famia cu no por pone pan ariba nan mesa dor cu nan a perde trabou y dor cu nan  salario no ta yega pa motibo di aumento di prijsnan y aumento di costo di bida, esaki tin su impacto social. Desempleo y preocupacion pa subida di costo di bida ta trece stress cun’e y stress den famia, problema den pareha, problema cu y entre yiunan, etc. Ademas por tin combinacion di problemanan hunto cu uzo di alcohol y substancianan. Tur esaki ta pone cu awor si nos ta haya nos den un berdadero crisis social. Nos ta awor aki na un cruzada unda gobierno en berdad mester bisa kico nan kier cu pais Aruba y Wyatt-Ras ta haya cu djies bisa cu mester tuma un decision final pa cu Citgo no ta e forma di anda cu preocupacion di nos hendenan.

Ta fresco den nos memoria con e minister di Asuntonan Social y Labor a priminti den campanja cu e lo zorg pa  trabou den CITGO pero envez cu nos hendenan a haya trabou, nan a wordo kita for di trabou. E gobierno aki mester stop di ganja y stop di discuti cu otro. Gobierno envez di dal un stap padilanti y otro patras mester tuma accion berdadero pa mehora e situacion di nos famianan.  Por pone cuanto placa cu kier pa fondo di crisis social pero si nos hendenan no tin placa pa pone pan ariba mesa di nan famia e problemanan social lo crece.Gobierno mester stop di priminti y ganja pueblo y bin cu solucionan berdadero.

Por menciona abuso di mucha. Gobierno a ganja cu nada no a ser haci dor di gobierno anterior, mientras esaki no ta berdad y awor aki cu gobierno a priminti cantidad di cos tin mas caso di abuso di mucha cu nunca. Mescos cu e ley di castigo minimo cu te ainda no a ser pasa. A pone un stap dilanti y a bin bek patras. Asina no a cumpli cu tur loke a ser priminti. Si cos sigui asina si menciona e asunto di peticion pa asilo no pais lo ta den un berdadero crisis ocasiona dor di e ministernan y gobierno di crisis.