Mervin Wyatt-Ras (AVP): Rapport di Algemen Rekenkamer pa cu FASE ta devastador pa gobierno

Dialuna dia 4 di juli 2022 lo trata e ley di FASE den Parlamento. Un ley pa por hustifica mal maneho di gobierno pa atende cu COVID-19 pa medio di un fondo social. A faborece friends and family y awor kier hustifica esaki. 

Siman pasa diamars, Parlamento a haya un presentacion di Algemene Rekenkamer (ARA) encuanto di nan investigacion di FASE. E rapport di esaki a drenta Parlamento dia 5 di mei 2022. A investiga si gobierno a haci suficiente pa e suma yega cerca esunnan cu tabatin mester na un forma eficiente. Ta trata di 42.9 miyon florin den 2020. Pa 2021 36.3 miyon y total 79.2 miyon florin.

ARA ta consciente di e situacion dificil di COVID-19, sinembargo ora ta trata fondo publico gobierno no por a permiti risico di maluso  di placa di pueblo. Mester a garantisa cu netamente esunnan cu tin mester a bin na remarca pa haya yudansa pa medio di FASE. Uzo eficiente y segun metanan ta necesario ora ta trata placa di pueblo. Pueblo mester por ser garantisa riba trato igual y no beneficio di amigo y famia.  

Conclusion di e investigacion di ARA ta devastador pa gobierno cu sin pia ni cabes, sin metanan fiha y cla a lanta un body pa sin reglanan fiho ni criterianan bon defini ni controlabel duna yudansa na pueblo durante temporada di COVID-19. 

Door di esaki a paga cierto personanan dobel y otronan no a haya pago, sin por a controla si e yudansa a bay pa esunnan cu tabatin mester. P’esey por bisa cu casonan igual no a wordo trata igual. 

A entrega un suma standard di 950 florin. Pues no a haci ningun investigacion di entrada di e ciudadano, prome cu entrega e suma. Tabatin personanan cu banda di FASE tabatin otro entrada mientras cu tabatin persona cu no tabatin nada, mientras tur a haya mesun suma. Un persona tabata otorga e uitkering dor di cual no por a controla manera debe ser.  Tabata tarda pa cierto hende haya pago mientras cu pa otronan por a haya pago mas lihe. 

Un desbentaha grandi tabata alabes cu no por e entrega “bezwaar” formal contra di un decision. Tampoco no tabatin comunicacion bon y efectivo entre instancianan Asunto Social, SVB y Finansas. Un desbentaha hopi grandi segun ARA ta cu no tabatin un cuadro legal pa FASE. Aki no por a garantisa e “rechtszekerheid” di e ciudadano cu lo mester a bin na remarca. ARA ta considera e uitkeringnan entrega for di FASE como ilegal dor cu no tin un ley pa legalisa FASE. Loke gobierno si a haci bon tabata e propaganda pa FASE y a uza FASE pa beneficio politico. Tambe tabata facil pa entrega un peticion. 

Pa futuro lo mester regla e cuadro legal. ARA no por contesta kico ta otro stap cu mester wordo tuma pa pone gobierno responsabilisa. Den caso di e fondo di crisisplan ta door di insistencia di fraccion di AVP y preguntanan haci al respecto dor di Wyatt-Ras a pasa e fondo aki den Parlamento. Den e caso aki ARA a investiga probablemente dor di critica den pueblo y e rapport ta papia pa su mes. 

Por ultimo, Wyatt-Ras lo trata e ley di FASE den un reunion publico di Parlamento. Esaki pa gobierno por hustifica y cubri su mes di erornan ya cometi. E minister kier a haci mescos cu e fondo di crisisplan, pero e mester a pasa e ley bou presion di Wyatt-Ras y fraccion di AVP, despues tambe CFT a oblig’e traha un ley al respecto.