Mervin Wyatt-Ras (AVP): A urgi AZV pa busca otro forma pa hustifica recorte di 5 miyon

265

Diahuebs atardi Comision di Salud Publico a tene un reunion hunto cu AZV, pa loke ta trata e bezuiniging cu lo bay tuma luga. Manera tur hende sa Hulanda a stipula bon cla cu si Aruba mester haya un fiansa, varios reforma mester tuma luga entre otro den salud publico. Comunidad ta preocupa cu e ahustenan. Ta poniendo presion pa AZV reduci su gastonan cu 5% y ta traduci esaki den cuido medico. Comunidad a reacciona riba e cambionan aki cual no a cay den mucho bon tera.

Mervin Wyatt-Ras, parlamentario di fraccion di AVP a splica cu a reuni durante tres ora largo cu AZV unda cu en berdad a cuestiona locual ta e diferente medidanan cu lo mester a wordo tuma, unda cu contribucion propio ta loke cu kier a wordo introduci. A duna un splicacion di cinco wave cu nan lo bin cun’e y dado momento tambe pa bay botica busca remedi, pa bay laboratorio, fysiotherapie mester duna un contribucion.

Parlamento a finalisa reunion cu ehecutivonan di AZV

Parlamento a finalisa reunion cu ehecutivonan di AZV

Posted by 24ora on Thursday, July 9, 2020

E preguntanan tabata si tin otro camindanan tambe. Wyatt-Ras a haci e pregunta cu enbes di bay bezuinig riba e personanan cu tin cu bay dialyse of personanan cu tin cu bay haya un djente falso of ranca djente, vooral pa nos grandinan lo wordo afecta pa esey y si lo no bay corta den e gastonan operacional.

A duna di conoce cu a corta den e gastonan tambe operacional di AZV y a pidi tambe e 5.5% den e diferente dunadonan di cuido. Ademas tambe den otro gastonan, cual ta 5%. Banda di esey a bin e contribucion propio. Por bisa cu casi tur parlamentario cu tabata tey a bin cu pregunta. En berdad a trece dilanti con por haci otro.

Por ehempel specialistanan ta bisa en bes di corta den e pashent, cu ta wordo referi na un specialista, por bay introduci un contribucion propio. Por ehempel na Spoed Eisende Hulp, cu tin biaha hende ta bin cu no ta necesario.

Eynan por bisa cu si e cuido ta necesario, e persona ta wordo trata, pero si no, e persona por scoge en bes cu ta warda pa e dia siguiente, e ta paga un tiki y ta wordo trata. Ta un forma cu por haya un compromiso di e personanan. E ora por corta eynan.

A trece esey como ehempel. E parlamentario a trece padilanti durante e reunion, pa sinta cu diferente dunadonan di cuido. Consulta cu nan y check kico nan ta pensa riba esaki. AZV a contesta cu nan a check cu nan, pero a base individual. Awo nan a lanta un sorto di comision di e diferente dunadonan di cuido cu lo bay discuti riba e asunto aki, pa asina yega na algo. Nan ta bisa cu nan lo kier discuti tambe di cambionan mas structural.

Esey ta wordo cada biaha indica cu lo mester bin diferente cambio structural. Segun Parlamento, e mester wordo consulta cu esnan cu ta duna cuido, pasobra nan ta sinti e dolor tambe di e pashentnan. Na e momento aki, lo bay sinti’e. 

Nos ta den un situacion cu lo bay te hasta Rijswet cu lo bay impone tambe riba nos cuido. Segun e parlamentario, no solamente den e parti financiero, economia, pero tambe den cuido, den husticia y enseñansa.

A urgi tambe na AZV pa nan tambe busca otro formanan kisas pa hustifica cu nos mester corta asina hopi. 5 miyon ta hopi pa nos pueblo y kisas e por bira menos. Eynan tambe a duna esey na AZV. 

Tin cu bisa cu nan tabata hopi habri cu e comision y a contesta tur e preguntanan. Pero si mester keda den discusion cu nan. Ta urgi e minister pa duna cierto splicacion, pasobra ta haci preguntanan, minister no ta contestando. Tin di compronde si for di AZV cu nan a perde nan entrada. Esey a baha cu 60%, cual ta hopi halto. Door di esey nan no tin e cifranan exacto.

Kisas e ora e ta bira dificil pa comunica. Pero en berdad e personanan cu ta den e setting eynan, naturalmente mester wordo envolvi. Sino no por bin cu cambionan asina drastico.

Parlamento ta haya nan mes confronta ora cu leynan bin cu mester aproba. Si yega asina leu cu bin diferente eigen contribucion, manera e receptregel, ora di bay botica of esun pa ora di bay diferente di e terapistanan, e ora ey, esey tin cu bin Parlamento pa asina por trat’e.

Awor aki tin un situacion cu tin cu entrega, no tin placa. No ta husto si cu ta bay bin cu mas gasto pa nos hendenan, cu ya caba tin’e dificil. 37 mil persona ta sin entrada. Mas of menos 10 mil a haya FASE. Otronan ta bin na remarca pa e loonsubsidie, pero tin un cantidad di otro hende cu no a bin na remarca pa esaki. E ta duro na e momentonan aki pa nos pueblo. Awo tin cu wak kico lo bay haci al respecto.