Merca ta ofrece 15 miyon pa Nicolas Maduro y 10 miyon pa su oficialnan

4863

Esaki ta e noticia cu a bira conoci un poco rato paso. Departamento di Estado ta bisa cu e regimen di Nicolas Maduro tin relacion cu guerrilla Colombiano y cu organisacionnan terorista internacional manera Hezbollah.

Gobierno di Merca a bin ta trahando riba medidanan contra Gobierno di Maduro, cu nan no ta reconoce como esun legitimo.

Diferente persona halto di Gobierno di Maduro a keda deteni y husga manera Hugo Carvajal. Husticia na Merca a condena dos sobrino di casa di Maduro, Cilia Flores, y a blokia tur cuenta di e regimen den e sistema financiero internacional.

Departamento di Husticia a presenta dilanti fiscal general William Barr, y a anuncia “recompensa pa informacion cu por hiba na detencion y aresto” di Maduro y otro miembronan di e regimen.

E otro oficialnan Venezolano acusa ta Diosdado Cabello Rondón, presidente di e Asamblea Constituye “ilegal”; Hugo Carvajal Barrios, ex director di inteligencia militar; general retira Cliver Alcalá Cordones, y Tareck Zaidan El Aissami Maddah, ministro di Industria y Produccion Nacional. Gobierno ta ofrece un recompensa di 15 miyon dollar a cambio di informacion riba Maduro y 10 miyon pa informacion cu ta conduci na detencion di e otro oficialnan.

Secretario di Estado Mike Pompeo, a bisa den un comunicado “Merca ta comprometi pa yuda e pueblo Venezolano pa restaura democracia por medio di eleccionnan presidencial liber y husto”.

E acusacion ta un aumento di e presion di presidente Donald Trump pa kita Maduro di poder. “Awe Departamento di Husticia ta procesa Nicolas Maduro ….,” Marco Rubio, Senador, a adelanta via di Twitter.  

Comments

comments