Secretario di Estado Mericano, Mike Pompeo, a nenga pa saca su diplomaticonan for di Caracas, argumentando cu e gobierno a corta lasonan diplomatico cu Merca, no ta legitimo y ta menasa pa “tuma accionnan apropia” si algun hende ta na peliger.
“Nos ta haci un yamado na e forsanan militar y di siguridad Venezolano pa nan sigui proteha e bienestar di tur e ciudadanonan Venezolano, como tambe di e ciudadanonan Mericano y stranhero na Venezuela,” Pompeo a bisa den un comunicado diaranson anochi, agregando cu nan lo tuma e medidanan adecuado pa responsabilisa cualkier persona cu pone na peliger e siguridad di nos mision y su personal.”
E presidente di Venezuela, Nicolas Maduro, a declara diaranson tur e diplomaticonan Mericano, como personanan non grata, despues cu Washington a reconoce e lider di oposicion Juan Guaido como presidente di e pais.
Guaido, sin embargo, a bisa cu e kier pa e diplomaticonan Mericano keda, preparando e escenario pa un posibel incidente diplomatico.
Pompeo a argumenta, cu como Washington no ta reconoce e “regimen” di Maduro, su ordo pa e diplomaticonan Mericano retira, no ta legitimo y a agrega cu Washington lo mantene relacionnan diplomatico cu Caracas, unicamente atrabes di e gobierno di Guaido.
Despues cu e administracion di Trump a reconoce e gobierno di Guaido, varios aliado di Merca a sigui su ehempel, incluyendo mayoria di e paisnan di OEA y Canada.
E lidernan di Union Europeo tambe a respalda e gobierno rebelde. Cuba y Bolivia a expresa nan apoyo na Maduro, mientras cu Mexico a bisa cu nan lo sigui reconoce e legitimidad di Maduro “pa awo”.
Vocero di e canciyeria Ruso, Maria Zakharova, a bisa cu e “seleccion manual” di un gobierno na Caracas, ta ilustra perfectamente e berdadero sentimentonan occidental, pa e comunidad internacional. Ley, soberania y no inherencia na e asuntonan interno di e estadonan.
