Siman pasa diabierna a tuma luga un reunion cu Christian R. Olsen, Consul pa asuntonan politico y economico di Merca, staciona na Corsou. Durante e reunion a elabora riba diferente topico cu e meta final pa fortifica e lasonan cu Merca riba entre otro tereno di Enseñanza, Siguridad, Economia y Salubridad Publico.
COMISHON FIHO DI PARLAMENTO
Manera ta conoci aña pasa Parlamento a instala un comishon fiho nobo cu yama Commissie Noord-Amerikaanse Relaties (CNAR). Meta di e comision aki ta pa explora oportunidadnan pa Aruba na Merca riba tereno economico, enseñanza, siguridad y salubridad publico. Pa e motibo aki Presidente di Parlamento, mr. Ady Thijsen, a manda un carta caba pa Minister Plenipotenciario mr. Joselin Croes pa yega na un programa concreto pa e bishita di trabou. Manera e Consul di Merca staciona na Corsou, Christian Olsen mes a indica, tin hopi posibilidad y ta importante pa reuni cu miembronan di “senate” y “house of representatives”.
PROGRAMA “EDUCATION USA”
Durante e reunion cu Consul Olsen a toca diferente programa cu Merca por ofrece Aruba riba tereno di liderasgo, entre otro un programa cu yama “Education USA”, cual lo amplia e accesibilidad na Universidadnan Mericano pa nos hobennan Arubiano. Ta trata aki di e nivel di “undergraduate”, “graduate” te cu nivel di PHD. Tambe a papia riba mas posibilidad pa Aruba pa loke ta participacion na programanan di liderasgo manera “International Visitor Leadership Program” y “Young Leaders of the America’s Initiative”.
HUSTICIA Y SIGURIDAD
Aruba pa hopi aña caba ta colabora cu Merca riba tereno di siguridad y husticia. Olsen ta entre otro encarga pa coordina tur cooperacion cu tin entre Husticia Arubano y Merca pa loke ta programanan di cooperacion. El a splica cu den cuadro di esaki a identifica, hunto cu “stakeholders” na Aruba, traficacion di hende y Polis di Bario, como e topiconan cu lo bay colabora mas intenso. Aruba cu Merca tin un “Memorandum of Understanding” firma ya pa hopi aña caba pa colabora riba diferente topico.
Banda di esey nos a trece padilanti tambe cu lo ta bon pa Aruba haya un punto di contacto specifico pa loke ta colaboracion entre departamentonan Hudicial di Aruba y Merca, riba tereno di material, training y combatimento di crimen. Consul Olsen a trece pa dilanti cu riba nivel federal mester explora e posibilidadnan aki.
Otro topiconan di combersacion tawata e situacion na Venezuela y ayudo pa mitiga riesgonan y tambe intercambio di informacion. Pero tambe a papia riba posibilidadnan pa riba termino largo establece programanan di training di FBI y DEA na Aruba.
PA CONCLUI
Un reunion hopi fructifero den cual di ambos banda a enfatisa e importancia pa un colaboracion mas fuerte. E Consul di Merca tawatin hopi elogio tambe pa mr. Joselin Croes, nos Minister Plenipotenciario na Washington, pa e tremendo trabou cu e ta desplega na Merca.
